Thil mak ve tak – ‘Hot Spring’

      2 Comments on Thil mak ve tak – ‘Hot Spring’

Kar hmasaka ka thil hmu mak ve deu pakhat ruonglevaisuo.comer hai hriet dingin hei thur dawk ka tih. A hrie ta sa hai khan mi lo nuisaw chuong naw unla.

A khu lui lui hi tuilum khu chu a nih

Kar hmasak khan vai ruol iemanizat, kei le ka ruolpa Jacob Shakum leh Himachal Pradesh-ah study tour-in kan fe a. Hmun pakhat kan sir chu ‘Hot Spring’ an ti el, Manikaran a um a nih. Manikaran hi Kulla a inthawka Km 45 a hla a um, Parvati vadung kama um a nih. Kullu hi Himachal Pradesh state sunga district pakhat a nih. Hi vadung pang, vadung tuiluongin a chim phak chara hin hnuoi sunga inthawka hung suok tuilum inthlawk a um a. Chu tuilum chu 100 degree Celsius neka lum a nih. A hung suokna lai tak lem chu a so hin a so but but el a nih, bel lien taka tui ei suong thlawk ang hin.

Hi tui lum hi sun le zan, fur le thala hung inkhaw dawk el a ni a. Sikh haiin an biekin, gurudwara an bawl khuma. An sawr tangkai zek el. Hi tuilum hmang hin thlai an suonga, hi hmuna va fe hai chun bu an fak seng hlak ni awm a nih. Kei ni khawm kan hei tlung chuh, a ieng kan thaw hma’n kan pheikhawk an min hlip tir sawk sawka. Bu fa dingin ka thung thlar tieu nghala. Bu le hme chi dang dang chu tuiluma an suong vawng chu kan fak ve kha tie. Vai hme a ni leiin inhnik chu ka ti lawm lawm nawh. Bu le hme an suong dan chuh: Bel suonga an sie sa vawng bu le hme khah a bel pumin tuilum hung inkhaw suoka chun pil lo deuin an phuma, darkar chanve vel hnungah a hmin pei a nih.

Bu kan fak zo chun lutuom pakhat hin a mi thuoi a, khaw lai hmun tak am kan fe ding ti ka hriet hman hma’n an pathien biekna pindan-ah kan luta. Vai ruol chu bawkkhupin an tawngtai sup supa. To tawka ka lo thlir zing lai chun ka lungrilin pathien tehlem an biek leiin ka zuk lunginsiet deu khawp el. Ka hrila awi ding ni hai sien chuh Pathien hring, an ni biek ang ni lo a um ti hih ka hril awm vei leh!

Chu zova chun ‘Hot Cave’ an ti pindan chi te te tuilum hung suokin a bang le tuong hai a suklum phak sunga chun kan lut nawka. Tui lum hu chu a khu chei chuoi leiin thla khawm lak thei an naw tieng pang a nih. A tuilum hung inkhaw suokna bul el lai lem chu a tuong khawm ke lawnga sir ngam lo khawpin a lum a nih.

A tui inthlawk tak

A lim ei hmu ang hin gurudwara hi lientak el, a sawnga an bawl a nih. Riekna le insilna pindan khawm thahnem tawk tak a um. An ni hai, pathien bie dinga fe hai chu an riek hlaka, uluk takin hi tuiluma hin a insil hlak a nih. Taksa damna beiseiin an insil hlak a nih. An dam pui le pui naw ruok chu ka hriet bik ta nawh.

An ni hril dan chun hi lai hmuna hin Vai hai pathien Shiva le a nuhmei Parvati chu an insila. Parvati chun a nabe a sukthlaka. Chu phing chun Shiva chun chu vadunga tui chunga chun a thiltheina suk langin, tui chu suk thlawkin nabe tamtak a hung phu suoka. Chu taka inthawka tui inthlawk hin hung suok tan ni’n an hril. An dik ngut dim chuh! Mak ve tak chuh khan gang vadung tui dei taluo ringawt laia tuilum inthlawk hung inkhaw dawk kha a nih. Scientific deua hrilfie thei ei um am aw?

Read: 1912

2 thoughts on “Thil mak ve tak – ‘Hot Spring’

Leave a Reply