Tlangval Diary-II: Christmas Chawl

      3 Comments on Tlangval Diary-II: Christmas Chawl

December ni 17, 2011(inrinni) chun Imphal Tulihal Airport a chun ka zuk tum ve a. Ka bag nei ve sun sunhai chu inbawr lala paiin inhmawtakin Airport anthawk chun ka suok a. Airport tuola chun Taxi driver haiin an mi lo kuoi zak zaka, taxi hire man tamzie hre zing pumin nuom naw tehlem insirin ka maksan tawl a. Lamlien bula minute sawmpanga vel ka nghak hnung chun Bus ka kham chat thei hlau a, bandh a um leiin a kalman a to deu ani ti malamin conductor chun sawmsari a mi hni a, damtakin zantieng ni nema Churachandpur ka zuk tlung ve ta a, ei ni mi ngawt ei zuk hmu chun thlamuong a um cher cher khawp el. Lamsira vai ei hmu phawt kha chu ei zuk khek khum nuom el a nih.

Churachandpura chun ka puhai ina kan nghata, ka sang school kaia um le chun kan inhmu bawk a, pawlsawm exam ding a ni leiin venga Christmas hmanga a hung thei naw ding thu a mi lo hril chu ka ngai suk zuol khawp el. Thiemna le varna hnawt hin chu sungkuo a mi keidar nasa zie dam ka ngaituo a, inkhata bubel khat le hme chikhat sungkuo kimin an lo fak hluom hluom el lai chu a hadam awm de aw ti dam a min ngaituo tir vawng vawng. Zan inkhawm tin chun thalaiin hla an inchuka, Delhi a ka ruolhai le inpawl nuom hle in lang khawm mani kohran chita Christmas hla inchuk dingin ka ruolhai chu an inthe dar vawnga. Inpawl tak tak hman lovin zan a hung sawt nawk el ta a, kei khawm chu ka puhai kohran hla inchuka tawite ka um met hnung chun ka tin ta a.

Pathien ni tuk a hung ni a, mani biekin chita inkhawm dingin mipui chu inkawkal nukin an fe tawla, kei khawm ka puhai kohran ngeia inkhawm ding chun ka pu chun bufak tawm sungkuo inkhawmnaah a hril sa leiin, kohran dang biekin pahni fe kanin ka puhai inkhawmna chun ka van khawm a. Christmas ding kar khat vel chau um sienkhawm, inkhawm chu kan re thupa, nu le pahai lem chu nauhai thuomhnaw thar ding ngaituona a sawl le beidawng tak tak nihai sien an hawi thei hle. Mitin tadinga chanchintha lawmum ei lawmna ding hi ‘Lungngaina hapta’ a ei inchangtir an ti dam ka hriet dawk vawng vawng chu tie. Pathienni suna chun ka ruolhai le kan inhmukhawm tawl ta tawka, venga inhmukhawm intak zie dam kan hril mawl mawla, a then chu Thalai thuoitu dam an ni tawl leiin, inhmawtakin an mi maksan nawk nghala, zana khawm chun mani kohran chita inthe in, inpawl hman ta lovin inngaitakin mangtha kan inphur tawl ta a.

Thawtanni zingkar chun kan veng tieng pan ding chun Truck lien deu el, a thlawna chuong theina hi a uma, MLA in candidate ding pakhatin a hire kha a lo na, pawisa nei rak naw lang khawm a thlawna chuong chu ka rin hle a, nisienkhawm motor dang a um hlawl naw leiin Truck ruoka chun mihriem sawmnga vel kan inhnaw luta, sunnithlakin busep angin truck chun ami sepa, a then innui rak rakin an titi zinga, MLA hai ei sawr thei nasun tiin an hlim hle thung. Kan pang popo sil raka kan intet hnung chun kan veng, ka piengna le ka nu le pahaiin nghakhla taka an mi lo thlirna hmun chun ka tlung ve hram ta a.

Christmas a hnai ta a, naupang school kai hai khawm hung suokin, veng chu a khu luoi luoi zing el a. Tui a harsa leiin, a tutu khawmin insil le insukfai an ngai pawimaw naw hle. Ruol le pai hlui tamtak ei zuk hmu chu khawsawt a um nuom ngei el. Tienlai nun anga Delhi a fiemthaw na a an hmang hlak hai kha ka khuo le venga chu tulai nun a lo ni zing el a. Christmas a hung ni khawm chun, ka ngaituo le ka suongtuona hai angin a um ta naw reng reng. Kan khuo chite a khawm chun biekin tamtak a um a, ka naupang laia ka ruolpawl hlak hai khawm chu kohran dang dang a hai an lo um tawl ta, a hminga kei  anga lekha inchuk ve tawk tawk hai khawm kha kohran school dang danga hotu sin dam an lo thaw leiin sungkuo khat biekin pakhata inlawi thei ta lo tam tak ka hmu in ka lungril a na em ema. Thawthei hlak ka nei si nawh.

Biekin hlak chu lunga indeng phak tawk chau chaua inkarin a um fir fera, unau sungkhat ngei khawm in er em emin an zuk um tawl a. ‘Remna Lal’ piengchampha a inser Christmas chu inrem rak loa hmangin ka biekin senga inremna sermon kan ngaithlak diel diel. Mipui kan la tlawm si, kohran a tama, venga um mitinin kohrana nina an nei deu seng, mani kohran chita buoi kan buoi seng a, kohrana buoi phak naw hai po chu damdawi le inrui ding zawngin an buoi ani deu tak. Ei ruoltha hai khawm kohran danga an inkhawm chun ei inpawl hman tak tak nawh. Chuelbaka, election kum ding tak a lo ni leiin, ram hmangaitu haiin political pawl tum tumin kohranin a kei the hnung an la zuk kei dar nawka. Pi le pu haiin ek ben chek an ti nekin eiin chek amani ding aw ti dam ka ngaituona chun a cham hle. Khawvela ka ngaitak kan venga ka chawl hmang chu a bo nawk vang ta a, lungril sawlna tamtak min thlun sienkhawm ka ngainatna chu a bo chuong nawh.

Delhi tienga kir chu a ngai nawk el ding an ta a, kan veng boruok chu inhawinaw ti hle lang khawm Delhi kir chu ka peinaw khawp el. Mani piengna hi chu an hawi tam an hawinaw tam, ngainat chu a um bik khawp el a nih. Kan khuo le veng harsatna hmu lang khawm thawthei hlak ka nei si naw, inthuruol thei inlang chu an hawi ding zie dam ka suongtuo a, nikhat chu kan lan thuruol nawk ngei beiseiin, ka beiseina chun ka lungril kan hnem a. Iengkhawm ninaw lang khawm kan venga chu Vairam khawpui haia zu um phak chu an mi lo ngaisang ang reng. Papui thenkhatin a lekhathiem thiem hmun danga in um pei a a mawl po venga in mi maksan pei chun changkang chu harsa tak a ni thu an mi hril chu ka lungrila tu chen hin a la cham zing.

Read: 1620

3 thoughts on “Tlangval Diary-II: Christmas Chawl

  1. Hminga Songate

    Ei nghakhla bawka a tiem a lo an hawi hrep chu tie. I tienami ziek hin ei sawsaiti ngirhmun iemanizat i phawr lang chieng khawp el. Hi hin a hlutna a suk zuol tlat.
    Part III khawm a la um an naw?

Leave a Reply