Ka Sang!

      4 Comments on Ka Sang!

Ka piengna chu khuote a ni a, khawpui chu hla rak lo a nih. Nitinin ka nu le pa chu kan huon/ram ah sin an thaw hlak a.

Nuhmeite naupang titak ah ni khat chu RAWMAWL (Hankerchief) ka dit em em a, ka ruol dang nuhmeitehaiin an nei vawng lei ning a tih. Ka pa pawisa chu cheng sawm kan rûk el ta a. “Tu’m ka sum inruk?” ti’n ka pa a hrâng vel chu ka ṭi taluo a, ka ip tlat a. “In mi hril naw chun ka vuok ve ve ding cheu a nih” a ti chun, ka sangpa’n ka Pa ban ah chelin. “Pa, kei ka nih” a ti a, ka sangpa chun ka thil suksuol chu a mawphurin hrem a tuok el ta a.

Zanṭhang lai chun ka tho dawk a, ka ṭap rak el ta a, ka sangpa chun ka hmur  mi hup pekin, “U U, thil liem ta hnunghai chu theinghil rawh” a mi ti pek a. Ka sangpa’n a mi humhim laia a hmelput kha iengtik khawm theinghil ngai ta nawng ka tih. Chuong hun lai chun ka sangpa chu kum 8 an ta a, kei ruok chu kum 11 ka ni tah. Thudik tak hril ngam lo a ka dawizep el kha vawisun ni chen khawmin ka lan sir zing. Kha thil kha ka ngaituo changin ka lungril ah zani lai ang elin a lan lang zing hlak a nih.

Ka sang chu pawl sawmpahni ṭha takin a zo a, kei khawm university a ding chun admission an mi phal pek a. Chu zan chun ka nu le pa lungril chu a sawl hle a, ka pa’n “Ei nauhai chu hlawtlingna ṭhatak an dawng a ni a” a vel velin a hril a. Ka nu’n Ieng am a hlawk a? An pahni’n iengtin am ei enkawl zo ding a na?” a ti a. Chuong lai chun ka sangpa chu kan room a inthawk tho dawkin ka nu le pa kuom ah “Kei chu lekha ka tiem rawnin a huntawk ta tho a, kan chuk zawm pei ta nawh” a va ti chun, ka pa’n “Ieng dinga tumna chautak i nei am a na? In tin ah kutdaw a tul khawmin chawm ka cheu a, in pahni’n in inchukzo ding a nih” ti’n a dawn a.

Ka sangpa bieng chu damte’n ka tuoi a, tlem tumin “Ngo, nang chu pasal i na, inchuk zawm naw chun iengtin am ei insung harsatna a inthawkin suok dawk thei ei ta, nang inchuk lem ding a nih, kei ka thutlukna chu kei inchuk zawm ka tum ta nawh” ka ti pek a.

Zingkar inhmatak chun ka sangpa chu a thuomnaw tlawmte a nei le bezeu chu chawiin tukhawm kan hriet lovin kan In chu maksanin khawpui tieng chu a pan el ta a. Lekha chite ah “ U U, university a admission hmu chu thil awlai a ni nawh. Feng ka ta, sinthawin pawisa ka hung thawn hlak ding che a nih” ti a lo inziek a. Chu lekha te chu ka awmah kuo detin ka dittawkin ka rawl bo chen ka tap rak rak el tah a.

Chuongchun ka pa’n sum a puk le ka sang construction a cement bag a phurnaa a hlaw dawk sumhai chun ka lekha inchuk chu ka sunzawm a. Hi kum hin kei chu kum 20 kan ta a, ka sangpa chu kum 17 a ni tah.

Ni khat chu lekha ka room ah ka tiem laiin ka room-mate nu chun, “Tlangrammi pakhatin tuol ah khun a zawng che” a hung ti a. “Tum chuongang mi hmu nuom ding chu?” Tuol ka suok a, hla raklo a chun ka sangpa chu Cement le rawngin a tuom vel thuomhnaw inbel a inthuom chu ka hei hmu a, a kuom chu ka pan tah a. Ka sangpa kuom ah chun “Ienglei a ka sangpa i nih ti i hril naw am a na?” ti’n kan dawn a ama chun innui hieuin “Kan lang dan hi en ta la…I sang ka nih ti ka hril chun iengtin am an ngai ding che? An in nuisaw naw ding che a ni?” ti’n a mi dawn a. Ka lungril a tawk em em a, mitthli bieng ah a tla a. Ka sangpa zakuo chu ka ben fai vel a. Ka hnuk mi ul rak, tawng ṭha theilo chun “Mihaiin iengtin am an mi ngai ti ka pawisa nawh. Ka sangpa i ni a, inlangdanin iengkhawm danglamna a nei nawh” ti’n kan zawt a. Ka sangpa chun a mansa a inthawkin pengpelep lim a mawitak a siem bakkil chu hung kei dawkin, “Nunghak po-poin hi hi an nei vawnga, nang khawmin dit ve’ng i tih ka ti leia a thak a hung ka nih” ti’n chu thil chu a mi hung pek a. Ka sangpa chu khang lai khan kum 20 an ta a kei ruok chu kum 23 ka ni tah.

Pasal ka hung neia khawpui ah umin, vawitamtak ka sunghai chu ka pasalin khawpui ah hung insawn dingin ngen sienlakhawm, “Hi hin ka um hi kei ni chun inhawi kan ti nih” ti’n chu chu ka sangpa thutlukna khawm a nih. Ka sangpa khawm chu a sinthawna ah a hung kai sang a, kan kuom ah um a, kan business thawna ah mi enkawlpuitu ni dingin kan ngen khawm chu a nuom naw a. “U U, nangin i pasal le i tarpuhai thatakin enkawl lem rawh, keini chu kan buoi ve ta nawh” a ti a.

Ni khat chu ka sangpa’n a ke a suk pal leiin Hospital ah ka pasal leh kan va kan a. Ka sangpa kuomah, “Ka thu awi la chu hieng anga insukpalna hi i nei naw ding ana” ka ti pek leh ama’n “Kei lekha kan chuk sang naw a, I thil hril kha lo pawm lang in business thaw chu ka suk hlawtling zo naw ding a nih ti ka hriet annawm” a ti a. “Kei a lei a inchuk sang lo i ni kha teh” ti’n ka dawn a, ka pasal leh kan mitthli a tla hiel a. “Ieng dinga hun liemta hnunghai i hril am ana” ti’n ka sangpa chun ka kut a hung chel a. Hienglai hin kei chu kum 29 ka ni ta a, ka sangpa chu kum 26 a ni tah.

Ka sangpa chu kum 30 a ni’n kan veng tlangram a mi chu nuhmeiin a nei a. A nuhmei neina ah chun, “Tu am khawvel ah i ngaisang takin i hmangai tak a?” ti’n zawna an siem a. Ama chun ngaituo hranpa tul ta lovin “Ka U” ti’n. Hieng hin a thu hril chu a sunzawm pei a, “ Primary School ah kan kai laiin kan School fe na chu darkar hni lam zet a ni a, ka phingṭam leiin ka lawn zo ta naw a, ka U khawm a phingṭam ve bawk ding, ama’n ka in tlung rakin a mi puok tlunga, in kan tlungin a phingtam sawl taluo leiin a damnaw zui nghal a, kha ni a inthawkin ka U chu ka damsungin hmangai tang ka tih ti kan tiem a nih’ ti’n a hril a. Mipuiin kut an ben sup sup lai a U nu chu a mi suk ṭap nawk tah a.

A tawp tah!

Read: 1333

4 thoughts on “Ka Sang!

  1. Hminga Songate

    A tiem an hawi ie, Henry khawm a ziek rawn deu deu a, a kambe a ngei deu deu a nih.

    Unau inlaichinna ṭha tak el, model i hung thursuok a nih.

  2. Zawla Thiek

    Mi tamtak inhnar chu ni ngawt in tih. Unau khawm nisien, nk le tlangval inkar khawm nisienla hmangaina tak tak in a tuom hlak chanchinhai hrim hrim hi chu a ngai an hawi in lung a tawk naw thei nawh ie.. A tha khawpel.

Leave a Reply