Chel el lang, tlangin mi rêl an tîm

      8 Comments on Chel el lang, tlangin mi rêl an tîm

(A hnuoia short story hih thutak besana ziek a nih. Part hni a ṭhe a ni a. Part khatna chu laklaw taka ka suk tawp a nih. A mihriem chuh mi hung indawn buoi dal ro aw)

Tûk dang ang bawkin Mawipui chu zing dar 6 a hung inri meu chun kawmpuan sungah taksa insawizawi dingin a pindan a inthawkin a hung suok a. A piengnal le hmelṭhatna chu zing nisa suok, sak tieng kawla tlang le tlang kâra hung inhersuok mêk leh tekhi naw ruol an nawh. A mawi tawk le inchawi tawka hmaihlo a hung innâl ta hlak lo ni naw reng sien khawm hmangaina mit a lo thlir hlaktu tlangval tading chun zing ni suok leh tekhi naw ruol ni chuong naw nih.

Taksa sawi zawi am, Thanglien hmu dinga a mawina hung suk lang ti hriet hlei thei khawm ni lova, Thanglien hmu phakna tieng tienga zing tin ela hung inlawn hlak, nunghak hmelṭha le piengnal em em el, Mawipui chu vawi le khatin a zawi tla hnawk a. Tuk tina lo thlir zing hlaktu, Thanglien chun mak a ti ta em em a. A  hang en ṭha nawk chun Mawipui chu a nakuo le a mobile suk tawkin a bau phawng chuong si lovin hnuoi a en vawng vawng a hmu a. Thanglien lungril chu a himaw ṭan ta hle el. Sinlung Hostel a warden an ni leiin naupanghai enkai a ṭul leiin Thanglien chu lungril inhawi naw tak pumin naupanghai lekha tiemna pindan tieng a pan a. Hun remchang hmasa takah Mawipui chu inhmupui a, thil umdan indawn dingin lungril a siem fel ta a.

Naupanghaiin zingkar lekha an tiem zo chun Mawipui be dingin Thanglien chu insawng hnuoi tieng a pan tla hnak hnak a. Zingkara a thil hmu leia lungril himawna le inhawinawna chu tlang taka hei hril nghal dingin an thlahrung hle a. Hawphur tak si in, ngaiven lo thei lova a ngai leiin thil ramtin a hril ta tho a.

“Mawipui, vawi tuk chu i zingtho a fuk rak naw am a nih?”

“U Thanglien, fuk tho e. Iem a ti leh?”

“Thil mawi naw-ah ngai chuong naw la, nang ang hmelṭha le piengnal hi ka tadingin khawvela hmu nuom um tak a ni a. Tûk tina ei Hostel tuolzawla i hung inher hlak hi ka tading chun hlimna hlawmpui hmu ang a ni a. I mi hrietthiem naw khawm ka ring lai zingin, a hiptu i sakhmel mawi hin kan sûm theina hai a mi hne pek tlat si.”

“U Thanglien, I thu hril chu tak tak ni sien ka lawm ding bah! Ka nina bâk bâka i min pak derna chu lawm um hle sien khawm, awi harsa ka ti tlat”.

“Mawipui, tak tak ni e. Amiruokchuh, vawi tûk a, i phone call dawng khah i tlukpui ni’n ka hung hmu che a. Ieng thu hlawl am an tah? Ka hriet ve chu remchang dingin ka ring naw a, anachuh, ṭhangpui theina che ka lo nei tâk hlauin ka hung indawn reng reng che nih.”

“U Thang, hmangaina hi a lo mak ngei! Ka hrietthiem bîk nawh. Mihriem pakhat ve bawk chun hmangai tak dam ka lo nei ve a. Sienkhawm, ka hmangai chun ka hmangaina hi a mi hrietpui ka ring nawh. Nuhmei el ka ni si leiin, ka tlin tawk le thei tawka ka changzie a ka suklang hi ka hmangaiin a mi hrietthiempui bawk nawh. Annawleh, tlingzo lo nghaknu an hril ang chau ka ni hiel am an tah.”

“Mawipui, ei chan an ang hle in ka hriet. Kei val lungmawl, ka phulo sakhmel ṭha ka tawng lei hin lungril sawlna tam tak ka tuok ve an sawn naw! Nang ni hai ang, hmel ṭha le pieng nal, insung khawsakna khawm mi chuong en, ieng leia insûm zing am i n’a? I hmangaina pawm nuom nawtu hi tuhai ang hlawl a lien le angur hrai chawi am ning an ti aw? I huoisenna po sawm khawmin an hnu hma hin hei hril phawng el rawh.”

“U Thanglien, a lan hnu nawh ti thei khawm an ta nawh. Vawi tuka ka thu hriet khan ka hmangaina, ka lungrila mi sawk veltu hi an hliem takzet a nih.”

“Mawi, hril phawng el rawh. A ṭul chun kei khawm palai dingin inpe el ka tih. Mi hei hril ta, iengtin am?”

Chu lai tak chun naupanghai bufak dar a hung inri ral ral leiin, an inbiekna khawm sunzawm thei ta lovin bufakna pindan tieng an pan nghal a.

Thanglien chun Mawipui thuhril chu a lungrilah a vawng zing a. Mawipuiin a lo hmangai, tlangval vangnei chu tu am aw a ni ding ti ngaituona in a lungril a hluo sip a. A lungrilah duthu sâmin, chu tlangval vangnei ni ama a hang inbel a. Mawipui hmelṭhatna le piengnal zie, a hawihawm zie le fel zie hai po po chu a hriet sa vawng a ni leiin, chu tlangval vangnei ah a hang inbel sin ringawt khawm chun a hlim em em a. Sienkhawm, suongtuona rama inthawka a hang ṭhanghar ruok chun a lungril chu rawk puokin a um nawk hlak si. Thil dang reng reng ngaituo thei lovin sun huna naupang an chuktirna chen khawm a sukbuoi pha hiel a nih.

Sikul an ṭin char a inthawk chun Thanglien chun Mawipui hmu dan ding a ngaituo nghal a. A lungrila thil um chun an um ṭawk ṭawk tir thei ta der nawh. Mawipui room tieng chu a pan nghal a. Chuonga, nunghak pakhatin ngaizawng a nei a, hril ngam bawk si lo va buoipui dinga inthawk chu awm naw le tlawm tlakah ngai sien khawm, Mawipui tadinga a lungril le ngaituona tam tak a lo pekna lei le hriet a nuomna lei chun a tirlui a. Nuhmei room a va lut em chuh mawia a hriet naw leiin naupang hai insawp hun, chawhnung ni nem-ah tuol zawla thingbuk hnuoia chun thingpui dawn dingin a hei ko a. Mawipui chu a hung el naw a. Thingpui a lo dei zo vawng hnung chun a hung inlang ṭawk a. Ni dang neka nal le mawiin a hmai a hung phawk leia inhnu a nih ti hriet thei ni sien khawm suonlam dang a la siem ṭal tho. Chu hrie naw ding Thanglien chu Mawipui tadingin mikhuol lenglak el a ni si nawh. Thanglien in a hei hmu char chun a lungril po po chu ni danga lo intui hlak ta sien khawm, hi ṭum zet hin chuh a thalin a pâr vang chu tie.

Mawipui hmela chun beidawngna inlang sien khawm, a hmelṭhatna ruok chuh a kiem chuong nawh.

“U Thang, i mi nghak sawt ta? Thaw ding ṭul deu ka la nei a, ka hung vat thei naw a, i lo nuor deu ta maw?”

“Mawi, ka nuor naw ie.”

“U Thang, ka lungril sawl dân hi chuh an ril a nih. Hei hril phawng el lang: Vawi tûk khan ei kohran a missionary pakhatin kan inah palai a lo tir a. Ka sunghai kuomah ngaizawng ka nei naw ti a ka lo hril hlak lei le ka tadinga ṭha a an hriet leiin thirdam sie thei dingin an lo hril a. Ei pastor iemani zat khawm an ṭhang bawk leiin ka nu hai chun sel chi ah an ngai naw a. Chu phing leh, thirdam khawm chuh vawisun khan an lo sie nawk nghal a ni awm ie.”

“Mawi, ka lawmpui ngawt el che. I tadinga ṭha i nu le pa’n an hriet a ni chuh…….”

“U Thang, nang chenin chuonga i mi ti chuh.”

Mawipui chu ṭawng zawm thei ta lovin a um a. A mitthli a far zawi zawi a. Thanglien khawm chu a lungril a chawk a. A hmel chuh an thim a. Mawipui chu an sûm zo hlawl ta naw leiin Thanglien chuh a kuo ta chawt a. Mawipui chun, “U Thanglien, mi hrie thiem hram raw aw” tiin an hnîk fak fak a. Thanglien chun, “Mawipui, ṭhangpui theina che ka nei am? I tadingin iengkim kan huom annawm” tiin insûm zo bik ta lo chun Mawipui chu a awm leh a kuo de ta zing a. Mawipui chun, “U Thang, i ṭawngbau nuhnung tak chuh khawvela ka mamaw tak a nih. Lunginsiettakin, mi hriethiem hram rawh. Kha chen khah ka hmangaina che hih hril ngam lovin ka lo ip ta a. Ka’n sûm zo hlawl ta naw nih. Hi beidawngna khura inthawka mi sansuok thei um sun chuh nang i nih.” Thanglien chun, “Mawipui, lungngai der nawh. Ka hmangaina che hin kei le kei ka’n sitna hi a ner ngam hlawl naw leiin ieng leiin am ka hmangai tak chuh chân thei ka ta?” tiin Mawipui chuh a theitawpin a hnêm a.

Naupanghai enkai a hun nawk ta leiin, dit tawk lo takin naupanghai pindan tieng an pan a. Sawtnawte hnunga chun Mawipui phone chu a hung inri ral ral a. A pa haiin zan-ah a huoltu missionary pa le inhmu dingin an in tienga riek dingin an hung ko a. An thawkna sikul chuh kohran ta a ni leiin le kohran ṭhuoitu ṭhenkhatin an hrietpui leiin hostel chu maksan sien khawm buoina a um naw ding thu an hung hril a. Chu phing chun, Mawipui chu beidawng takin a ṭap thlawk thlawk a. Thanglien chuh iengkim a hei hril nghal a. Thanglien lungril chu fei a sun angin a hung na nghal a. Thanglien chuh an ngaituo ta a. Mawipui hi a dang chun a sin a derthawng thei ding le pastor le missionary hai kal zawnga a che chun vangduoina a chunga tlung thei ding awmin a hriet a. Mawipui a hei inthla el ding chuh a phal naw bawk si. A lungril chu an chawm chawrawk vel a.

Chel el lang, tlangin mi rêl an tîm,

Mat le riel ang ṭhapui ei inṭhe ding chuh!

Read: 1446

8 thoughts on “Chel el lang, tlangin mi rêl an tîm

  1. Darsanglien Khawbung

    “Cheih….damsung in Parte ka ngai em che”……lungrila….a ziek tupa a hung inlang a….hieng anga hmangaina tak…ama tawng le mi dang tawng khawm nisien….lungril tawk em2 a, a ziek thiem lei hi chu ni ngei pakhat a tih…tuta an nu (Ka pi) khawm, a hlem tluk el theina san hi…… Mihriem hi hmel ena inkhi ding nilovin…lungril hi a lo ti ti!!!! Rose Rose Rose

  2. Darsanglien Khawbung

    “Lim ngate surah ka dang hlak ie,,,,aw…dang hlak ie…Mi uu kalchawi ka dang zo nawh suor tlanga, aw…hlim taka lungleng hril dingin…..hei ti nawk ka ti.. Dead Rose

  3. Ralsun Hmar

    A tiem anhawi ie, hung ziek zawm nawk ta rawh… “Kawmpuan” khi vel 3 ka tiem hnungin ka hriet suok thei chau, hehe… “Kawmpaun” ni lem sien a hriet anhawiin a kawk fuk lem el di’m? ‘a’ ri hi a hmasa lem a hawi baka?…

Leave a Reply