Krismas zakuo !!!!

      4 Comments on Krismas zakuo !!!!

Nupui nau pahni nei ka nia, ka nauhai khawm an khata tlei thei khawpa upa an ni ta leiin nautenu hai angin ka buoi ve naw a, nitin a office kai ka nih ti lo chu insung ah varzang tak ka nih.Krismas hi thlarau mi ka ni rak naw leiin Pathien tieng pang nekin mawitaka In (house) chei le krismas bazar kai ti vel hi ka ngai pawimaw lem hlak a,  chu chu ka thlakhla tak khawm a ni hrim hlak a nih.

Kum dang ang bawkin hun le nihai chun favang inher liemin thlasik a hung chuongkai puia. Muol le tlanghai chu romeiin a zam vel a. A boruok leh inhme lo khawm inti el thei mak takin ka naupang hun a hringnun dam, ka nunghak hun lai dam le thil dang dang ka ngaituoa lung an len vawng vawng ni’n ka hriet. Ruol hlui hai dam an hmel mitthla’n ka hmu a, khawlai am annawleh iengtin am hringnun an hmang ve ta ding chu aw!!!!

Hi ni hin ni dang naw ang takin ka office ṭinin Krismas bazar ka hung kai malam a. Thuomhnaw dang dang an zawrna dawr ah chun inchawk ding ka en kuol vel lai chun pasalte pakhat hin a pi ni ngei dingin ka ring pitar pakhat kut chu chelin a pi chu kei chat tum ni awmtakin a lawn dan pangngai a inthawkin muong changin an tawl a. Ka en zinga,  ama chun zakuo hring pakhat nuhmeite zakuo hi a khika, a pi kawlah inchaw pek dingin a ngen ni dingin ka ring chawt el a.

Thil dang ah a buoi leiin a pi chun a dawndai hman naw a. Amiruokchu, chu pasalte chu insawn a tum naw hrim hrim. A zawrpa kuom tieng chu a hnaia, a man an dawna, naupang fak chi inchawk ang ela inchawk el thei an nawh ti a hung hriet lei ni ngei a tih a hmel a chun an chawk thei naw leia pawi ti ngawi ngawi leia rinum ti hmel lim an langin ka hmu leiin ka lunginsieta, ka va pan hnaia. “Hi nuhmeite zakuo hring hi i dit a ni?” ti’n kan dawna, ama chun ka ringnaw tieng daiin “Aw, ka sangin zakuo hring hi a dit theia, a hak pha pha a hmel khawm a ṭha a. Ama chu vanram ah a mi zamsana, ka pa’n ka nu khawm a fe vat ding anih a mi ti pek leiin hi zakuo hring hi Krismas-a a hak ding thawn ngei ka nuom a nih” ti’n a mi dawn a.

A sangin a thisan a nih ti chu ka hung hriet tah a, a nu khawm thi thei el ngirhmuna um a ni ka hrietin ka lunginsiet em em a. Ka ṭhangpuitheina umsun chu hi zakuo hring inchawkpek hi a nih ti ka hriet. Dawrneipa kuomah chun a man kan dawna, a man nep chu ka tum teu teu nawh. A man a ti zat khawm chu a tlawm taluo ka ti lem nuom hiel a. Kan chawk zovin, ” Bawi, i sang Krismas zakuo ding hi hi aw” ti’n ka peka. A hlimzie chu a hmel a inthawkin ka hmu theia, kei khawm ka hlima, hmangaina leia Bethlehem a naute hung pieng khawm khan kei ni pahni chanchin hi a hriet ve ngei ding a nia, keini nekin a hlim lem ka ring a nih.

In tieng ka kir chun thil pakhat ka ngaituo dawk thuta; ni khat nia, motor accident leia hringna chanhai laia mi kha an ni ve ngei ding a ni hi tie, ti’n.

Ka lungrila hla hung inlang chu hieng anghin damte’n ka saka, “Ni ropui tak hung tlung ding chu, kawl nisuok angin ei Lalpa hung var a ta………ṭhe hnunghai le ei Lalpa tuokin la hang vuong ei tih”. Ka sak indik am khawm ka hriet nawh. Ka thiltuok hin sermon ropuitak a mi pek ni’n ka hriet a, hmangaia min tlantu’n ei hringnun hmang dan hi mi en sien iengtin am aw a mi ngai ding chuh !!?? Hmangaina ei tlaksam ta zie dam, retheihai ngirhmun ei sie hnuoi zie dam le a dang dang dam ka ngaituo pha hiela.

Kha Krismas kha ka hmang fuk hle ni’n ka hriet leiin Pathien kuomah lawmthu ka hrila. Ama angpuia a mihriem siemhai chunga hmangaina ei inlangtir dam hi Ama chunga ei thaw nih ti ka hmu chieng ni’n ka hriet a. Thlarau tienga uor rak nekin a mihriem siem, u le nau, venghai le mi dang danghai kuoma hmangaina inlangtir hi Krismas thiltum tak khawm nisienla pa Pathien khawm a lawm lem ding a ni zie ka mimal tak ngaituona’n ka dande ta hmawt lem an tah, asanchu hmangaina lei lieu lieua a naupa khat neisun pek ei ni sia, HMANGAINA neka a chunghnung lem ding hi um thei dingin ringna khawm ka siem thei nawh.

In rengin Krismas chibai!

Read: 1283

4 thoughts on “Krismas zakuo !!!!

Leave a Reply