Minute 25 a inhnu

      2 Comments on Minute 25 a inhnu

– H.zate
– Hmar Rûn,
– 27 January 2014(Tuolbuol)

Hun hlimum tak hmangin inngaina deuin kan um hlak a, Indi rielin hun le ni kan lo hmang hlak. Kan umdan le kan chetzie a chun ruol el chu kan ni nawh ti chu mi khawmin an mi hriet a, sienkhawm ka nundan ṭhanaw lei le ka umdan invai chun ka hmangaitak chu ka hmangai naw sawnin sam-ang ṭhe zai ka lo rel el ta a. Ka hlimna ding raw’m sawnin innghilzai rel dingin ṭang dang ka bel san a. Ka ṭhatna ding sawnin naw dang ka nghat san a, sienkhawm, innghilzai rel chu hrillo, ka lungrilah a thar zinga, zing tin saktieng kawlah turni hung inhersuok in a zun hung suokpuiin sun ni sense hnuoiah hlak kieng zai a rel si nawh.

Tlaikhuo hung nguiin thlang kawlah turni an herliem a, a zun an herliem pui si nawh. Zan ani a, par anga kan lawm hlak Sawrthla a hung suok a, nghil zai rel nekin lungrukah a thar nawk si. Si-ar ma kawptea an leng laiin kei ruok chu Sawrthlapui iengin mate’n Laikhum ka bel nawk hlak.

Hun le ni liemin nun in tienlai anchang a, sienkhawm, lunglaiah a hlui thei si nawh. A tawp a tawp a chun hieng hin ka lungril ka siem fel ta a. Ama ngei hi a nih nuhmei laia ka lungril milpui le ka ta ni dinga ka dit chuh! Chuongchun, sakhmel tawnga, a chunga ka thil lo thaw hai leia ngaidam hniin biethu kim inhlan a, ka hmangaitak ani zie hril dingin hmuntin ramtin ah ka zawng ta a…

Hmu kar nghakhla takin a umna dinga ka ringna phawt a chun ka zawng a,sienkhawm ka hmu zo nawh. Beidawng le insir em em in ka lawn hnak hnak a, ka ke chun lampui a pil chu khu sat satin ka pal a, hningzu inrui lei a zawi ka ninaw a, tamsawl leia chau hlak ka ni bawk nawh. Natna khirkhan invawi lei a mitkhur inthuk hlak ka ninaw a, nisa en ngamnaw lei a kun ka ninaw a, ka dangchar em leia ka lei hi tawl hlak ani nawh. Hmangaina leiin ka na a, hmangaina ngaiin ka chau ani lem.

Beiseina beidawngthlak tak chu thim kara mei de ve ve ang hin a de ve ve a, chau ngawi ngawi pum chun Biek In tuol chu Ka hraw a, ka hei ngha a, ka beiseinaw le ka ring phak reng reng loin ka lo zawng rawp hlak ka hmangai chu ka hei hmu a. Mo thuoma in thuom in, an thuomna chu an hme in khawvela hlimtak hmel putin annui sieu a, inzak inphak khawm dawn lo chun ka va pan ve pawp a. kan sir zie le ama ngaia kan rum hlakzie dam, ka mamaw zie le ka hmangai zie ka hei inhlan nawk a. Sienkhawm, tap pum chun, “Valmawi, buon-ang pawm a am taka ei infawp ngawi ngawi lai hai kha lairilah chamin ka ngai em em hlak che a, I hung kir hun ding nghakin hun le ni ka lo hmang liem hlak a, hi thungna a thung hin I hung hun ka nghak a, hi pa hi nang ni lem la tiin duthu ka sam a, hi Biek In ka lut chen khawm khan i ta dinga in pe dingin ka lo nghak zing che, I hung si nawh. Sienkhawm, tuhin chu Minute 25 in inhnu tah. Valmawi, kei a leiin hun tamtak khawralin hmun hlatak a inthawkin i mi hung zawng ti chu ka hriet, sienkhawm, tuhin chu minute 25 in an hnu ta si” a ti a.

Virthli tle sieu sieu tawn zawng in lungngai em em chun kirzai ka rel nawk ta a, hlimtak a in theida lo taka kan umlai hai dam kha thei chang sien kokir ka nuom a, khang hunlai khan ruol el chu kan ninaw deu a nih. Hlimtaka inpawlin kan harsatna hai kan in hriltuo hlak a, ka lehawi a, ka hei en chun Biek In kawt a chun a la um ran a, a mothuom chun inhme in hlim hmel hle sienkhawm , a tap ran a.

Kawtthler khawro tak el Phingtamin fak a hmunawna a chun fe in , chau el tiengin chau langkhawm lairil ah ruok chu a thuhril kha lairilah ala cham zing si..

Boy I’ve missed your kisses all the time but this is
Twentyfive minutes too late
Though you travelled so far boy I’m sorry your are
Twentyfive minutes too late ….

http://www.hzate.wordpress.com/

Read: 1082

2 thoughts on “Minute 25 a inhnu

Leave a Reply