Air Condition(AC) to Ek-in bul!

– Darsanglien Khawbung (Mathew Pa)

January  4, 2014 hung inhersuok chun ka pieng a inthawka ka vawi khat in zinna dingin;  Kolkata khawpui pan dingin Aizawl a’nthawk  chun Net work Bus in ka ruolhai (5) le zantieng dar 5 in Aizawl kan suok san a. Bus sungah chun inti thei fahranin digital camera chun thla kan in lak kuol vel a, kan bula mihai in ieng tin takin am an mi ngai ding, mawl am an mi ti;  changkang!  Chu baka Guwahati an thawk Special train Air Condition (AC) ngat a, Kolkata pan ding kan la ni nawk, kan hei suongtuo ringawt khawm a, an hawi a nih.

Chuong chun, kan hei fe pei a,  zanril; mi re veng vawng lai chun Silchar chu kan hei tlan pel tep chun, thingpui dawr pakhat a hin thingpui dawn dingin kan la chawl a, chu lai hmun chu kan zin chang a, ka chawlna hlak hmun tho kha a ni, chuong lai chun, ka ruol hai chun, tui ropui (zu) chu an lak a, inhnik ti tak in an dit kar kar tawl a.

Kan chuongna chun kan tum ram pan nawk zai a rel phing leh, a sung a kan lut a, kan tlan nawk ta a, in hma takin Shillong kan tlung a, amiruokchu, Guwahati chu kan tum ram tak an leiin sawt chawl lovin, kan tlan thleng ta pei a, zantieng dar thum le a chanve in Guwahati kan tlung ta a. Zan dar ruk a rail a fe ding kan ni leiin rail station hnai na lai chun,  Hotel sawt naw  te um dingin kan buking a, kan thuom hnaw hai chu siem felin, kan insil fai bawk a, hun kan la nei tho leiin Bazar kan suok a. Chu kan Bazar na a chun, ka ruol hai chu lo fe zing zing ta hlak an ni leiin, chicken biryani, chiken tika, kelsa zeu an ti…an hei order ding chun, ka du zawng an mi hung in dawn chun; chiken Biryani ti in ka dawn a, kan reng a ding chun pahni kan order ta a, kan hei fak chu an hnik kan ti ngang el a, atawp tieng pang ( a ril) kan hei fak hnai pei, a thisen  king thalo a hung in lang pei, a hmin tha naw  ni tie, ti pum zingin a thisen le a ru le chun kan fak fai vawng ta tho a !

Kan hei suok nawk chun , Mizoram hai chu Baga an tlung chun a dawn ngai naw an um nawh; an ti ang in, zu zawrna hmuna an mi lut pui ta! Kei in Rum XXX le Whisky ti bak a hming ka hriet naw, a lo tam ngang el, Beer  chi hrang hrang  le zu, a  hming dang dang , a var, a hring,  a sen, a duk , a tam a mak a mak, a lo intlar chu e……!!!  kei in ka thlang ding ni sien chu hre hrang lovin, Mineral water thlang ngei ngei kan ring hiel. An du zawng zawng an hei thlang kuol hnung chun, Beer ka la dawn ngai naw leiin pahni lai ka lak ve a, kan Hotel kan tlung chun, kelsa leh an hung  thet ta a, kan thil nei seng kan hei tan a, Beer khawm alo inrui thei met chu ni in, ka ruolhai zu chu min dawn tir el ro ka ta, ei zu he hmel hre nek lo hai chun, a dawn ding an chun pe ro ti in , an lo phal nasa khawp el a, quarter vel ka hei bei hnung chun, ka kai tan ta! Thlalak in sawka kan thaw ta sek el.

Chulai tak chun, kan fe a hung hun ta a, kan insiem sawk sawk zo chun, rel station tieng chu kan pan ta a, counter ah chun kan ruolhai in bag sie’ng ei ta ticket va comfirm ei tiu ti a an fe lai chun, kan rail an cancelled thu in an lo dawn el ta. January 5, 2014 zan ngei ngei tlung kan ngai bawk. Kan ticket cancelled  bawk, chuong a kan buoi zuol lai tak chun, kei ve chu, ka Wills Flake la suokin ka hawp ka ti le, rel platform lai chu lo ni in, railway police hai in an mi hung ko chun, ka va fe a, an mi lo man nawk el ta, Assamese in an mi biek, keiin saptawngin ka biek, Assamese tawngin mi be rawh an mi ti po leh Saptawngin mi be ve ro ka ti ve pei. Thil tula inzin ding ka ni leiin duty officer hung ko ro ka ti, an duty na rum lut ka tum, phal bawk lo hai… Sing hni (20,000) fine rawh an mi ti ta deu deu, chu lai tak chun ka ruolhai ka hei phone; an ni chun, general  a ding ticket Kanchenjunga Rail ah kan lak el a ni, minutes 10 vel ei la nei an hung ti ta, kei Police haiin an mi man an ta, ka ziel hawp leiin ka ti chu; an rang an rangin an hung tlan a, insuo ro kan in hmaw, hun kan nei tlawm nang ni mei mei mi suk buoi hman kan ti nawh an ti, an lung a sen ta deu deu, inrui buoi bawk, rel hung hnai ta bawk, lan sel buoi zing bawk;  E……. nang ni khawm in bag hung la ro an ta?  An bag an hang  scan le zu um bur 4 lai an hmu nawk, lak lut phal an nawh, sing thum (Rs,30,000)  fine ding an mi ti nawk pei, kan chuongna ding rail a hung in ri ta bawk, mi suo phal bawk lo hai, ieng tin tin am a ni kan ruol pa chun a thaw  a, kan hriet nawn Rs.50 a peka,  kan suok thei hram a.

Chun le rel a hung chun defence ah ei lut ding a ni tu khawm in hmang lo ding ti in, kan hei inchu ta a le sipai ruol lai thungna chang le kar kan hla vat vat ie…… an hakat nasa si. AC a tiket la a, inhawi tawka Kolkata lut dinga in ngai lai, sipai hai chun, an seat min chang tir reng reng ta lo hai chuh… lungthlu lo zet in “EK-IN” bul te chu  kan chang in sang tak a lo ni el ta a, in hnawm ding an hung, kan hma ah an khaksaw an pei, an hnap an hnit, zankhat le chawhma kan chuong ta hnung chun;  kan phing a tam, lampui sira, vai thil zawr dei em em, ieng ieng am a kawp ti hriet lo, ek in bul, zun le hnap, khaksaw peina hmun inhawi tak a chun, in hnik ti ni awm takin kan hei fak chu, ka hnuk an bawk vel el, kan in a, buthing zanthum a upa ka hriet suok rum rum el a nih. Ka Kir tieng zet chu…Kolkata to Imphal Private Flight in hot tawk taka ka fe tawp.

Read: 1943

3 thoughts on “Air Condition(AC) to Ek-in bul!

    1. Ralsun Hmar

      hahah… kan nui hrep chu tie!!! Mizoram style hi a lo mak bik ngei, Chicken Biryani fak zovin TUI ROPUI hi an lo chen chau hlak ani maw? 30,000 chawina dinga 50 a in suok thei chu ropui tak a nih!!! Laugh Laugh Laugh

Leave a Reply