Nuhmei ka ni si!!!

      2 Comments on Nuhmei ka ni si!!!

Nuhmei a ka lo pieng hi kan sîr rawp hlak. Ngaizawng thu a le nuhmei pasal insuksiet thu amanih, annawleh nupa inṭhena thua hai hin nuhmeihai kan chan hi fair nawh ka ti thei khawp el a, amiruokchu khawvel fe dan a ni a, nuom thu a siemṭhat el thei ding a ni nawh. Hun le ni thar la hung inher suok pei a ding ruok chun thaw suol ang khat si chun hremna am a nih hmingsietnahai khawm in ang rawng sien la nuom a um khawp el.

Pasalhai hi suol ka hung ti deu deu a, an zerhuom kai rakin an hmangaina thu an min hlan a, mi lungril tak hlak chu ei hmu thei naw leiin a tak tak ngei a ni awm hi ti’n an zûnah ka (kan) lo thlu nawk hlak a, beiseina hlimum em emhai an mi’n hmutir chang a bo nawh, ei hringna nek chen khawmin ei hung ngaisak a, ei nei po inro lovin an ta dingin ei phal hnung ah, andittak an hmu ta lei ni ngei a ta, an mi ngaitha a, a tawp ah lem chu mi dang an mi belsan nawk el. Ei lungnat an hriet khawmin ieng ah an mi ngaipek ta naw a, insumzolo a mithli tla hai chu an ta dingin ningtelna chau dam a ni mei mei tah. Amiruokchu a chanchin nakie le ka la hung hril ding pa ruokchu hieng ang mi hi a ni ve naw a, pasalhai po po chunga ka ngaidan le hmu dan ṭha naw hai mi thleng danglam pektu a ni lem.

Awleh, kan unau mi pahni chau kan ni a, mi angin hausa naw inlangkhawm chantawk ah chu indu lal ve thei tho kan nih. Nu le pa’n an mi duot a, ka dit dit ka nei thei leiin ruolhai inhnar khawm ka hlaw el. High school ka hung kai ve a, kei le kei kan pakna thu nilovin mi’n hmelṭha ti’n an mi sawisak vet hlak. Darthlalang ah kan en chang khawm ka lung a awi hlie hlie’n kan hriet. Tlangvalte hai a hmelṭha deu ti a ka zuk mel zawt chang khawm ka en hma dai a mi lo en tawl dai an lo ni hlak a, chu chun mi ditum ka ni zie chu hriettheina chin ka nei. Chuong chun ka hrietnaw kar chun damte’n pasal ditna lungril ka lo nei a ni ta zing a, ruolhai khawm ngaizawng nei dam an um nuol ta leiin mak kan ti hranpa chuong nawh.

Ngaizawng ka hung nei ṭan a, hun hlimum tak tak hai ka hung tawng pei a. Nu le pa hlêm zeu zeu dam a hung ṭul ta pei a, insung neka tuol ngainatna dam a hung inṭan a, a kar chang lem chu khawpui a inchûk a zalen tak a um nuomna dam ka hung nei a. Inchei khawm a hma nekin ka hung inhnik let tam ta bawk, ka fe suol deu an ta ti hrie lang khawm khawvel dan reng a nih,  ti’n kei le kei kan thiem fawm el a.  Chuong chun ngaizawnghai lak a chu tulai ṭawng tak a dingin ka LÊR vieu khawm ning a tih, ka ngaizawng ṭhenkhat haiin mi dang le kan inbiek am a ni, annawleh function/public gathering a mi dang le kan lo ṭhungkawp lei dam mei mei chun an min sel pui a, an ni chau tlangval ni lo hai a ti’n, “I nuom le mi ṭhe rawh” ti’n ka dawn fawk hlak.  Ka EGO lei lieu lieu a ni tlangpui , ka tleirawl ngaizawnghai le kan in ṭhe nasan tak hai chu.

Ka lo beisei ang hrimin pawl sawmpahni ka zo chun, khawpui a inchukna sunzawm dingin ka nu le pa chu ka maksan ta a, nu le pa mi hmu naw a um na na na chu veng ding an vâng a, var tak a um a, mani thaw ding hrietnaw chun  boralna thei khawpa zalen ei nih.

Kei a anga lêr, tlangval khawm an lo tam ta khawp el khawpui a chu. Ngaizawng hung neiin, nunghak lai a nupa nun hmangna  chu ieng a khawm ngailona chen dam ka hung nei ta a, chuong chun ka hlutna tak chen khawm mi kawlah ka lo inhlan el an tah. Lalpa, mi ngaidam rawh!  Suol ka lo ti hai kha ienga khawm ngainawna ka hung nei deu deu a, a kar chang ka ngaizawngpa kuomah va riekin annawleh a remchang phat ama a hung riek a. Suol a chu ka lo thlulut inthuk ta khawp el! Ngaizawnghai le inhriet thiemnawin ei hung inṭhe a, sawtnawte ah a thar ei hung nei nawk a, hringnun hmang dan kha chu a pangngai tho.

Mi’n an mi dem chang an hril ding a um nawh, ti’n mi midemna hai chun ka lung ka suk sen a, ka thil thawsuolhai ruok chu ka hmu tum naw reng reng. Kan chukna khawm zo thei loin ka um pha a, a tawp ah chu vengtieng bawk a kir nawk kha lampui umsun chu a hung ni el ta si, ka ngaizawnghai hlak nuhmei an la nei nuom naw lei am a nih, annawleh nei ding en a an mi en naw? Ka hriet thiem bik nawh.

Vengtieng kirin kan khuoa college umsun ah, admission ka lak ṭha a. Tuhin chu puitling thawkkhat ah kan ngai ta a, var deuin  ka thaw ding thaw ka ta, ngaizawng nei khawm fimkhur ta dingin kan singsa a. Tlangval mi beiseitu thar an hung um nawk a, ka chanchinhai an hriet naw a, zuk inzui pui el chu thilṭha dingin ka ngai thei naw a, an hril nasa si a, ringzo ding hlie hlie in a um leiin ka thienghlim ta naw nih, tihai chen ka hril a, ama chun nunhluihai ah iengkhawm  buoi naw rawh ti’n a mi thlamuonga, a mi ngaidam ni a ka hriet leiin ka lawm hle.  Pasal hi chu aw anzie an thup thiem hle ning a tih, pasal ding en in ka hung en ta a, ama khawmin a ta angin a mi en ni’n ka hriet a. A mi nei ding khawm nilohai kuomah hman khang khan ka um a, a mi nei nuomtu chung a chun iem kan ro ding, ti’n ka nuhmei varna chun varal a lo kai naw ngei chu a ni hi, a mi hni taphawt le a nuom dan ang phawt chun ka taksa chen khawm ka lo phal nawk ta a. Hun tawite hnungah a mi ngaidan hai a hung danglam ta a, kum chanve zo ah chu kan hung in ṭhe nawk el tah. Hi chau hi nilovin chuong ang bawkin pakhat le khawm hun sawtnawte kan lo inzui nawk hman a, lungsen deuin a mi liemsan nawk  ti naw chu kan chanchin khawm ka hril pei nawh. Ka var thei naw tak tak chu a ni hih!

Pasalhai mizie hlak hi a mak, an rengin an ni naw khawmin a tamlem dai chu ni hrim hrim an tih. Nuhmei hai kuom ah inpha hnuoiin, a sûr a sa, a dei a lum dawn lovin nuhmeihai an par thlan theina ding a ni phawt chun iengkim thaw an inzuom vawng . Nuhmeihai kuomah chu naute ang elin an insek a, thil suksuol thei lo ding angelin an inhril chang hlak bo lo. An beisei tak an hmu pha, an ruolhai lai intitheina damin an hmang a, chu chu an holim nuom zawngna a ni tlangpui si. A nuhmeinu’n a nghawk taluo lei a, suk lungsen ding le suk nuor zie kha a nuom naw a, kha thil kha anhlan el a ni ti ngaituona chang khawm an hriet nawh.  A nuhmeinu’n a muolphona chen khawm inhuom a, a neisun an hlan el  a ni ti ngaituona chang lem chu an hriet der nawh, a bil a tho lo an tihai kha chu an ni hai ngei hi an ni hmel!

Kei le kei kan ngaisie a, mi po po ku hin an mi en dan khawm hi a mak vawng ni’n ka hriet a, kan ngaibel lei khawm ning a tih. Pasal reng reng chu a en khawm ka en pei ta naw ti inla khel hril chu ni nawng ka tih.  Ka khat a kan ngaituo chang ka nu le pa’n Pathien thu ah an min chuktirnahai kha lampui indiktak a ni lem ding a nih ti’n ka ta dingin Pathien bel chu a tha nih, ti chu ka chel tlat ta lem a.

Mi’n an mi hmusit nia kan hrietna lei khawm ning a ta, ka hmelṭhatna khawm hrietfuk a ni ta nawh. Amiruokchu ka nu le ka pa’n ka hmelṭha zie chu an mi lan pak zie a, mi’n an mi hmusit khawmin ka nu le pa ruok chun an mi hmangai a, beiseina tamtak ka chung ah an nei ti ka ngaituo chang le khawvel ta dingin nuizat um in, ka hmel ṭhatna’n umzie neinaw sienkhawm ka nu le pa ta ding ruok chun  ka nek a hmelṭha le fel an um nawh ti ka hrietin, ka lawm a, lungril a tawk el khel ah, lungriem mithli chen a thla naw thei nawh. Nu, pa, ka lawm taluo!  Nu le pa hmangina hi chu aw a thlukpui dingawm hmangaina hi khawvel ah a um nawh.

Final year ka hung thaw a, kum chenve zo ah kan chukna ka zo ding a ni ta lei chun ka lawm hle. Ngaizawng khawm kum hni zet nei ta lo ka ni a, ka ngaituona nunghak-pasal inditna tieng pe lo a chuong chen chen ka um lei khawmin a ruk takin ka lawm, amiruokchu thil hnung a ka hun hmang dan haiin a kar po leh ka lung an sukna hlak a, kei le kei khawm kan hnam hlak.
Ka facebook account a kar po leh ka hawng a, chanchinthar le thildang danghai hrietna in ka hmang khel ah ka hun awl sukbittu a ni a, thil ṭangkai tak tak le ngainuom um tak tak hrietna pha’n ka nei bawk leh a siemtu pa chung ah nasa takin ka lawm hiel a.

Mak danglam takin facebook ah ruol pakhat ka nei a, ama le chun a kar po leh kan inbiek hlak a, nunghak-tlangval thu tiengpang a mi hril pui ngai naw bawk leh a pawl inhawi ka ti thei hle. Thil ṭha tak takhai a mi hril hlak a, a chanchin a mi hrilhai khawm ngai nuom um ka ti thei a, hringnun a thlir danhai a inthawk khawmin ka beidawngna a inthawkin thlamuongna a mi pek hiel ni dingin ka ring. Kum chenve deu thaw, kan hun awl ah hai dam inbie hlak kan ni leiin innelna tak khawm kan nei ni’n ka hriet a, kan inngai am a ni aw ka ti hlak, a karchang chu. Ka ti ta ang khan ngaizawng nei chu ka tum ta naw leiin ieng anga fel le ṭha khawm nisienla a teu ta naw el a nih mi lo beisei sien khawm.

Pathien thu dam a mi hril pek hlak a, ka nu le pa khawm Pathien ringtu indiktak an ni khel ah tawngtai taima em em an nih, anni hai zar chun ka hringna hi siemtharin a um nawk ni’n ka hriet a, ka lawm hle. Ama pa lem chu lungnatna ka nei hun ah khawm ka nu le pa nek khawmin ama kuoma hril chu inhawi ka ti lem a, ka hril zo chun zang huou huouin kan hriet hlak. A hmel ka la hmu lo mihriem hieng ang lawm lawm a ka ringzo el hi mak ka ti a, a thlalak le a tak a danglam taluo naw chun hmelṭha tak ning a tih ti ka hriet a, a thlalakhai chu a kar po leh a vel velin ka en nawn nawk hlak. Mi’n comment an pekna hai a inthawk chun a mizie ding awm ka hriet thei a, pa fel tak a ni ding chu kan hmai nawh.

Nitin deu thaw thla li lai zet hun awl ah kan inbiek hlak chu a buoi lei ning a ta, a online ta ngai naw a, a mi call ta ngai bawk nawh. Kar khat zet a liem ta a, amiruokchu uve-auve khawm a la hung ti naw ran a, buoina dang a nei ning a ti ie ka ti leiin ngai muong hmawtin ka um a. Kei khawm exam nei ding ka ni leiin ka phone ka sie hmang a, exam sung po thlakhat sung chu hmang lovin ka sie a.

Exam ka hung zo a, phone ka hung hmang ṭan nawk hnung thla khat hnung ah khawm chun iengkhawm a chanchin ka hriet ta naw a, a mi biek ta ngai bawk naw leh a online hmu ding a um ta naw bawk. Buoina iem a ni tak chu a nei ni dingin ka ringa. A ruolhai ni ding deua ka ring pakhat tak chu kan dawn chawt el a, a mi dawnna chun ka chan a sukhai hle; Cancer natna tuorzo lovin muol a liem an tah , a pawi ngei, ti’n a mi dawn a. Ka hriet naw kar ka mithli a tla a.

A mi dit a ni chu ka hriet thei a, kei khawmin ka lo ngaizawng ni’n ka hriet a, pasal ni si a a mi beisei thu a hril el naw dam kha mak ka lo ti hlak kha a na, asan ding awm tu’n ka hriet ta a, chu chu ka lungnatna suk zuoltu a nih. Ngaizawng dingin mi bie sien chu ka nuom kha kan ring naw a, asanchu ngaizawng nei ka tum ta naw lei a nih, amiruokchu nuhmei dingin mi bie sien ka hriet naw kar lawm taluo’n inring deuin ka lo yes ngei kan ring.

Damte’n kan inchung tieng ka kai tung a, chung tieng ka en a, arasi an de phuor el. Ka mitthli ka huoi a, chung tieng ka en zing a, van a inthawkin mi hung thlir dingin ka ring. Ka mithli huoiin, tap tenui an ti po ka thaw a, beidawng taka ka um laia beiseina thar a mi kawk hmu hai le Pathien thu ah a mi siemthar hai lei chun lawmthu ka hril a.

Ka result a hung suok a, ka hlawtling leiin kan lawm tlang hle. Sawrkar sin zawnghai chu ka tum chuong naw a, kei le kei kan chawm theina ding ruokchu ka ngaituo a ṭul. Pathien rawngbawl khawm ka nuom bawk, ieng tak am thaw ding ti’n ka buoi hle laiin  ka vangneina siemin sin pakhat ka fak khawp char char ka hlawna ding Pathien rawngbawl nisi’n ka hmu a. A kar khat zo chun ka sinthawna ding tieng ka pan a, ka nuom tak thaw ding ka ni leiin ka lawm hle. Lampui ah chun earphone ka na ah inbukin mobile a mi hla chu ka ngai a;

Khawpui mawi chatuon ram ei tlung pha chun
Thi le inṭhe ti ta lovin
Lungdit fe hmasa hai le chawnban suiin
Hlimtakin chatuonin leng tang ka ti.

A tawp tah.

Read: 1880

2 thoughts on “Nuhmei ka ni si!!!

Leave a Reply