Ṭhang hlui nun v/s Ṭhang thar nun

Ṭhang hlui nun v/s Ṭhang thar nun

Hmarhai hi mani neka upa inza hnam, khawlai le puipung ni khuoa hawihawm taka che hlak, tlawmngai hnam niin ei inhril hlak a. Ṭhanghlui hai bau a inthawk le khawsak dan enin ei zie ni a ei bel hih an dik thawkkhat hle. Ṭhangthar hai khawsak le chetzie a inthawk ruok chun hieng zie mawi hai hi ei hnam zie-ah bel an tak ta hle thung. Entirna dingin a hnuoia hin tlawmte hang tarlang ei tih.

Tuol laia inhawi ti em em ruolcham inhnel lai neka upa haiin an tir chun, a thaw ding chu ieng khawm ni sien, chier der lovin an fe vang vang hlak. Inhnel laklaw hle sien khawm chier thei an ni nawh, mani neka upa hai tir an ni tlat leiin. Zantieng tuolzawlah thing ṭawl sepa, mei awi chângin neka upa haiin thing ṭawl inkhawm dinga an tir charin, an inkhawm el hlak. A tu sung le kuo, mi hausa le rethei khawm ni hai sien an neka upa haiin thaw dinga an ti hai chuh an sel ngai nawh. Asanchuh, ei hnam zie mawi, mani neka upa hai inzana khah khawlai nunah a la hring zing leiin a nih. Upa deu haiin an lu lingin an neka naupang hai an sirde tina a ni der nawh. A hun le hmun zir peiin an mawphurna an hrietin an thaw ve thung hlak. Vadungah nga man dinga a hawna an fe châng dam, ai meisersita an fe châng dam hin an nga man, ai man hai po chuh lukipa chan siemin, a naupang taka inthawkin chuong chan an siem hai chuh an thlang hmasa hlak. A upa deu hai chun an chan a mi dam khah a naupang hai an pek belsa hlak. Ruoiṭhe ni khuo a dam chuh tleng daw hmasa dingin a naupang taka inthawkin an tho a, ṭhalai hai chu za ngaiin naupang fak zovah pi tar le pu tar, nu le pa hai, chu zovah nunghak le tlangval an pu chau hlak. Tlang sin thaw ni khuoah, tlawmngaia fena nei ding zawng hran a ngai nawh, inpei sa zing lo ngir, tlawmngai inchu laia ṭhang naw chuh thil inzak um a nih. Mi tu khawma tlawmngaina sin an thaw hai chuh an tlang insampui ngai nawh. Uong le chapo thlakah an ngai a, mi haiin an hril châng khawma an inthlahrung hle hlak. An inthlahrung luotin, mi danghai tlawmngaina an inzawt lem hlak.

Tulaia ei khawtlang nun le ei zie ruok hi chuh a chunga ei tarlang letling char (opposite) a nih ti inla inkhel lawm lawm naw nih. Mipui ruoiṭhe-ah a tleng daw hmasa hai chuh ṭhalai deu vawng an nih. Naupang hai chu leh, an inhman leiin an lo nawr hmasa el rawi mawh, upa inngenna reng reng hmu ding a vâng. Naupang zani laia mitkeu chaua ngai hai khawm tui luok dinga tir intak ṭak vawng an nih. Mani neka upa hai hohlimna laia ṭawngmu kha fak kha fak el sak suok dam hih thil mawi lo tak ni sien khawm inti theina ang deua ngai ei tam tah. Mani neka upahai laia inzak inphak hrie chang lova ṭawng têm tuomhai hai dam hih ei hnam zie hawihawmna leh an mil naw rapthlak. Puipung ni khuoa mani neka upa hai ṭhungna inken nachang hrie an tlawm ta hle.

Khawvel hmasawnna’n ei inring hman hma’n a mi hung nang thut a. A umzie le hmang dan ei hriet tak tak hma’n Information Technology rasuok haiin ei kawtkai a hung chuongkai a. Ei mithiem hai le mi ril hai khawma an thlir hma’n mimir kut a hung tlung a. Chu hung rasuok pei chun social networking site (SNS) ei hung pawl nêl nghal a. Ei thaw suok le inmil lovin phone le computer hai ei hung mamaw sup sup a. Sura umpui mu hrietin ei hriet a, a thlarau ei niah a cheng nasa leiin ei hun ṭha hai ei khawral nasa em em. Ei diary hai hi mi tiem ding ei phal ngai naw a, tulai ruok chuh ei diary hai mitin hmu naw inlauin mi po po tiem thei dingin ei tlangzar hlak. Tulaia SNS inlar tak el, Facebook dam hih chanchin inhrietpawna dinga ṭha em em, inlaichinna siemṭhatna dinga ṭha taluo ringawt el ni sien khawm ei hmang suol nasat leiin hun ei khawral rawn pha el chau ni lovin thil ṭha lo tam tak an piengtir a nih.

Facebook hi inlaichinna siemṭhatna ding, chanchin inhrietpawna inrang le ngaidan hrisel neina dinga hmangruo ṭha em em a nih. Amiruokchuh, ei hnam zie mawi hai ei tlansan ta lei le ei inring hma a a mi hung nang leiin ei hmang suol nasa hle.
A bik takin, Facebook sunga group hai dam hih ei hmang suol nasa em em a nih. Hmang ṭangkai tumin ei hnam, khawtlanga thil (issue) hrang hrang hai le inzawma hohlimna ṭha neina dinga dawkan ṭha tak el a ni a. Ei hmang dan ruok hi chuh fûk nawna tam tak a um. Hawihawmna nei lo lo, lungril pawr pawr, hun awl nei nei, mani neka upa inzana nei naw naw haiin an kut hmawrin an lungrila thu kha hai an sâk suok nasa bîkna dawkan-ah ei siem a. Pa dawn chîk hai le hawihawm hai tading chun hmun a vâng hle. Ei pa hai ruol ruol dam inzana nei der lovin ṭawngmu kha em emin ei hei dawn fawk fawk a, pa inthlahrung thei deu hai tading lem chun ṭît ṭawt ti ngamna ruol an kuo nawh. Mihriemin ei i ngei naw tak, mi baksamna tak khîk pekna’n ei hmang a, hawihawm le thuhnuoi rawl taka thu sut nuom hlak ei vâng. Upa le naupang a mi rawt ruol vawng anga ngaina ei nei a, chu thil chun them thei lo khawvela inthawk them thei khawvel chen a mi nghawr pei ding a nih. Khawvel hmasawnna hai hi ei hnam zie leh ei hermil pei a va pawimaw deh! Thil hrim hrim chun ṭhatna le ṭhatnawna a nei deu vawng ang hin SNS hai khawm hi hmang ṭhat le hmang suol thei a ni leiin fimkhur taka ei hmang a pawimaw hle a nih.

Zie nghet nei lo, mihriem chuh pa rawnkai an ni ngai nawh, thli mutna tieng tienga in awn thing khawm a det indo ngai nawh. Khawvel hmasawnna ei pal meka hin ei hnam zie mawi le ṭha hai hih bansan lovin sawm le vawng thlak hai chuh suk vul pei dinga hmalak a pawimaw em em.

Read: 1947

2 thoughts on “Ṭhang hlui nun v/s Ṭhang thar nun

  1. C.Vincent Inbuon

    I hung ziek tha khawp el. Zuk tive bawk lang kan naupang deu lai khan khawhnawma inhnel kan tai ma khawp el a kan veng naupang ruol hih ka ruolpa le hin kan thuoi khawm in, a zatna (half) ve ve in kan the in kei ka rawi le ka ruoilpa rawi hai kha inbuona (Wrestling) kan in thaw tir hlak. Chuong hun lai a kan naupang thuoi zing2 pakhat chu kum 15 vel liem hnung in kan in hmu chun ka hming indak hlawk in ami hung ko el chu kei kan phalam lem vang anih. Laugh

Leave a Reply