Lalpa Ngȃia Kȃn Rȗmna Hai

      No Comments on Lalpa Ngȃia Kȃn Rȗmna Hai

“Felnaa phingṭȃma dangchȃrhai chu an hamṭha; an la khawp ding ani sih a” (Mat. 5:6)
By: Jim Greene

Mihriem damsung kum ding Bible mi ziek pek dan anga kum 70 zatve kheltienga papuitebawp in nghak inhuot vel chun “Vangduoina le harsatna hai hi, appointment lekha tunam an nei bȋk le, ṭhal romei an zamral fȗr khawthienga pȃrmawi rose par khawm hlinglai par annawm” ti hla Nk. Lalrengpui in rawl inki ver vawr, rengchal khawsawt khek rawng rawng ang ela a sak kha ka ngai veng venga, lal David in Sam 63 naa a tawnhriet zieksuok itthikna leia hnawchepna zara Judah thlaler rama vawihni zet a tlanhmang lai khan Pathien hrieknȃl ni zing siin lunghnȗla kȗr inkȗk ava awl pek awm ngei de aw! tiin ka sungtuona an vȃk vela. Nisienlakhawm, Pathien bawm umnaa inthawk kar hlatak le thiempu hai rawngbawlna in a huomna kheltienga Pathiena a dangchar ngawi ngawina, Pathiena a lunglawm kimna le Pathiena a ringzona ala kheksuokpui theina hin Lalpa ngȃia kȃn rȗmna hai amin thlierlȇt tira chuong hai chu ka hung zieksuok chu a nih.

Tlȃksam laia Lalpa ngȃina: Lal David chu thlaler ram ṭawla sakhi vadung tui chȃka an thuok hlawp hlawp anga a dangchar lai chun, a mamaw tak tui inthieng ani ti hretzing sienkhawm Pathien a zuk ngai ngawi ngawina hi a ropui anih. Mi ṭhenkhat hai ang nisienla chu “nikhat chu hnena puon la sil ka tih” tiin a sipai ringum hai le indo dan kalhmang hriltlang ngei an tih. Mi tamtak ta ding chun harsatna le beidawngna huna lungngai sȗmpui zȋngin Lalpa hmel var a hlie hlaka. Mani le mani inham buoiin kawng tinrenga suola ei ngai eilo thaw hlak hai chu intum kuol in, a ngentu hai ta dinga ngaidamnaa sip Pathien ani hmel reng hre lo in ei chunga thil suksuoltu hai ei ngaidam ang chaua mi ngaidam ve dinga ei ring hlak leiin suol hliempui tuorin ei invai hlaka. Ei harsatna haia inthawka mi ṭhangpuitu ding khawma fiel le ko harsa ei ti pha hiel hlak a nih.

Nisienlakhawm Lal David chun hmun inthienga Pathien thilthawtheina le a ropuina beisei taka a thlier angin rinum le harsatna hmuna khawm ṭhangpuitu var hnaitak ani hrezingin “Aw Pathien, nang chu ka Pathien I na, zingkar zawng ka ti che” tiin midang Pathien anga ngailoa “ka Pathien” alo ti ang hin ei harsat lai hin ‘ka Pathien’ ti ding hi ei nei ve am? Iengkim thawthei Pathien ka nei tia vawi tamtak ka tlanginsampui laiin ka harsat beidawng lai hin ka hringna hi ka Pathien ngaiin a dangchȃr in, ka taksa hin a ngai ve ngawi ngawi chie hlak am aw! Vawi tamtak chu ka Pathien hi primary source of help nilo in secondary in ka lo va sie ngun ngei deh! Ka zuk ṭawngṭai hlak khawma ka lungrila ṭhanpuitu ding a ka lo beisei hai chu hnuoi mihriem hai anni lem hlak si. Tlȃksam laia Lalpa ngȃia kȃn rȗmna hai chu zawlnei Isai in alo hrillawk ang hi ava tam ngei deh “Hieng mihai hin an mihung hnai a, an bau le an hmȗr hin an mi chawimawi hlak deha chu, an lungril chu keia hlatah an sawn hlaka, an mi ṭi na chu mihriemhai thupȇk miin an inchuktir el chu a nih” (Isa. 29:13).

Tlȃksam laia lungawina Krista: Hringmi tinreng haiin mani tluonglam hrawa, ṭhalem insanglem beiseia hringnun hmangtu hai ta ding chun “Lalpa chu ka berampu anih, tlasam naw ning” ti chu alo harsa ngei de maw! Pathien hmangaina chu tlȃksamna tuipuia inhliu zing laia hringna neka ngaihlut lem khawm hi thil harsa chu alo ni ngei. Revival ropui chang laia biekin sunga “lungawi pei ka chȋng tah, min chuktirtu ama ngei anih” tia lȃmpui lai ni hai kha lungngai nikhuoa mi kei ṭhuoitu dingin ava ṭha ngei deh. Lal David ruokchu lalṭhungphaa an ṭhung lai ni haia lungawi taka siemtu le a mamaw tinreng phuhruktu Pathien ani na hai chu khum laizawla a ngaituo zing hlak leiin thlaler hmun rinumtaka hringnun a hmang lai khawm in “Nang chu ami ṭhangpuitu I ni sih a, I thla hnuoia chun hlimin hla ka sak ding anih” alo ti thei a nih.

Ka hnuoi rothil neisun sun hai lei te hin lungawina kim nei angin ka lo in ngai hlaka, thina hlim varuom ka hraw laiin Krista hmel hlietu anlo ni rawp hlak si. Amiruokchu, mȗ ȃrlȃk vȃn laizawla vuongvel zing kara ȃrpui thlahnuoia ȃrte lungmuong taka a um anga, Lalpa thlahnuoi deihlim inhawia chawl hai ta ding chun lungawi nawna reng reng a um nawh a. Khawp le tlaitaka lal bu thleng inṭawmpuitu hai angin Pathien inpakna hlathar an hmȗra inthawk a luongsuok lem hlak alo nih. Chuleiin, tlȃksam laia Lalpa ngȃia kȃn rȗmna hai chun berȃm a hmul vȃwtu hmaa to zinga a um ang elin Krista chu nȇksawrin a uma sienkhawm a zainȇmna leiin a bau khawm a ka nawh ti amin hmutira, Pathien hmaa inngaitlȃwmna chu hringna nekin a ṭhalem leiin ka lungawina Krista alo ni nawk hlak.

Tlȃksam laia innghatna tlak Lalpa: Lungril varna, thiemna le insȃngna haiin hmun a lȃk meka, mihriem rorel fel le thiem, ṭhuoitu ṭha an pung deu deu bawk. Sienkhawm tlȃksamna’n inkieng zai reng a rel si nawh hring khawvela hin. Kristaa ei hringna chen suksiet tuma satene berȃm vun sil an inkat nuk zing bawk. Hmangaitu der neithangzai mautȃm mazu anga an hung inlȃr zing lai hin “I thu hi ka kehai ta dingin khȃwnvar ana, ka lampuia dingin var anih” ti hlado insam chu a harsa ngei de maw. Amiruokchu Lal David chu Pathien in a thlangsuok le Lalpa lungawi dana kalchawi ani ti a hriet leiin “Khȇl hril hmang hai bau chu hipin a um ding ani sih a” tiin Pathiena an nghatna alo kheksuokpui a nih.

Ka thla lungngaia riekmaw va ienga an vel ruoi lai hin innghatna tlak lungpui zawnga tlȃng tienga hai ka mit kan len vel lai chun “Vana khin nang naw tu am ka nei a? hnuoia khawm hin nang naw chu ka dit tukhawm an um nawh. Ka taksa le ka lungril hi a chau tah a, Nisienlakhawm, Pathien chu kumkhuoin ka lungril hratna ding le ka chanvo anih” (Sam 73: 25-26). Zion tlang sukhning ruol lo anga Lalpa ringtu hai ngirhmun ding alo nisi chun tawlailir le sakawr haia ringna innghat loa, Tlȃksam laia innghatna tlak Lalpa hminga iengkim innghat hin hadamna tluontling ami lo intlun ngei deh.

Thukharna: Kristaa Pathien sinthaw zo saa ngirhmun ei rem fȗka, hringna vadung tui inthieng ei hang dawn ṭana, vȃn mana ngei ei hang fȃk ṭan ta hin chu ringtu hringnuna ei beisei po po hmu kim ang vawngin inngai hlak inla khawm Lalpa ngȃina leia phingṭam dangcharna alo in ṭan lem chau anih. Chu tlȃksamna chun “Kei hi hringna bei chu ka nih” ti amin hrietsuok tira, kross lȇra “ka dang a char ie” tia khek rawng rawng pa hriethiemna amin nei tir hlak anih. Chu chau chu nilo in, kristaa inthawka luongsuok hringna tui inthieng nitina dawn chȃkna lungril amin puttir bawk. Chuleiin, ei tlȃksam laia Lalpa ngȃina neitu hai ta ding chun lungawina kim Krista hmel ei hmu in, innghatna tlȃk Lalpa Pathiena chun Lalpa ngȃia ei in rȗmna hai dawnna tluontling alo um rawp hlak.

“The more satisfaction you experience from God, while still in this world, the greater your desire for the next”
Dated: 31st July, 2014. Gurgoan Haryana

Read: 1558

Leave a Reply