Hlimna Thurȗk Ngei A Lo Nih

      No Comments on Hlimna Thurȗk Ngei A Lo Nih

“The secret of happiness is to count your blessings while others are adding up their troubles”
By: Jim Greene

Kum 1999 khan Tenksi, Papakuddi, Tamil Nadu-a New Life Ministries in project a nei na hmuna kristmas hmang dingin kan inchȗkna college students le hotu hai po po chu bus inhawitaka chuong in kan inthawk suoka. Tamil Nadu tlȃng lampui kan hraw lai chun lamkawia kan chuongna bus le thing phur truck inhmatuokin an inbaw chawt ela. Kan ruol hai imu thu deu hlek hai in bawr bawr lai chu an hmaa ṭhungna a chun in tet sawk khawm iemanizat zet chu an um. Chulaia vai tlangval pakhat chu a hner inhȇk sawka a tet leiin an thi peka, chuong lai zing chun ka laibungpa Jack L Joute chun “Laxman, count your teeth and name them one by one” a hang ti chu an nui naw kan um nawh. Chu chena inthawk chu Johnson Oatman, Jr hlaphuok “Count your blessings, name them one by one” hi hlimna thuruk alo ni thei zie ka ngaituo suok ta anih.

Mihriem hringnun hi harsatna sȗmpui zȋng hnuoia a hang intet tak tak hin chu iengkim kan tuok ta po a lungawi tang kan tih ti thei hi ani ngainaw hrim hrim hlak. Harsatna sȗmpui zȋng sa mȗp kara lungril ngaituona invȃk vel chun Krista zara hnuoi lawmna chau nilo, vȃn lawmna hai chen khawm inhmang zo vawnga in ngaiin, lungngaina sȗmpui kara lunghnȗlna lientak leh leng vel anga in ngaina a lien hle hlak anih. Amiruokchu muol letliem tiengpang ei hang thlier chun lungril chawlawl leia hriet khawp loa ei ngai hai Pathien malsawmna tiem senglo lo in tung fur chun ami ṭhawng nawk hlak si.

Chuleiin, Lalpa malsawmna ei dawng hai hi chiktea inlanga inthawk tiema, pakhat khata lamsuok ngau ngau chun ei chunga Pathien thilthaw hai hin mak tina in ami bunlet lem hlaka. Sam ziektu in Sam 124:1 a alo hril angin, “Ei tienga ṭhang chu Lalpa ni naw sien chu” tiin Lalpa I remruota in nghat ringtuhai nun kawng tinrenga hin nuorna ding hrim hi alo um nawh ei ti thei hlak anih.

Nisienlakhawm, harsatna tuipui fȃwn vel in a nuom aninga ami vȃwrlet ta chȃwk chu nitin mani kross put chu harsa le rinum ti ngawi ngawi chang alo um nawk hlaka. Takna hringnuna ding chun “tuorna khawm hlawkna” ti chu hung harsa peiin. Sipliem thlarau malsawmna chang dinga rohlu inhlȃn harsa ei ti zing laiin, a malsawmna hmu ṭheltu le tiem ngainawtu ta ding chun ringhlana khawzȋng a pik chau nilo’n ni inherliem zing kara “Aw Lalpa kuoma lawmthu hril ro, ama chu a ṭha sih a; a ngilneina khawm kumkhawtluong in a um ding ani sih a” tia hlasak chu thil theilo an chang nawk hlak. Chuleiin, Isu hming leia nitin a kross liengkoa innghat tu einia, Krista pasalṭha tirko hai le kum liemta po po sunga martyr chang hai hniekhnung zui tlȃk dinga Pathien malsawmna ei dawng tiem fu tu hai eini chun ei pheikhai vawr zȃng ngei a tih.

Ei chengna khawvela ruol le pȃi hai hmu thei khawpa inṭhanglien in taksa rama hausakna’n a vȗr zing laia Pu Ngamlalchawl hlaphuok “Tu hai khawm in an min hnar nawh, tuhai khawm hi kan hnar bawk nawh” ti po hi chu ava harsa ngei de aw. In hnarna in lungril a hung sipliem hlak chau ni lo in mani inngaisietna’n hnung a hung zui nawk hlak si. Amiruokchu, ei ṭhenum khawveng hai ro sum hmang senglo an nei zing laia lungawina kim chu “Ka rochan Lal Isu ka nei china ka lung a awi tawk zet anih”. Tirko Paula chun Ephesi kohran hai kuoma hiengang hin alo ziek anih “Ei Lalpa Isu Krista Pathien le Pa chu inpȃk in um raw se. Ama chun vȃn hmunhaia thlarau tieng malsȃwm pȇkna tinrengin Kristaa chun mal a mi sawm a” (Eph. 1:3) tiin. Suol ngȃidamna kheltienga chatuon hringna amin hlȃna, Pathien nauhaia min bȗkin a rohluopuitu ding hai chena ami hlȃngkai hi chu ava ropui ngei de aw! Hi khawvel ropuina le hausakna hai hin lungngȃina a sawm sa hlaka, thlarau tieng malsawmna hai ruok chu inhmang theilo le kin ni neilo an nih.

Harsatna a chin a lien hai kara lengvel in, ei damlai hringnun hi damte te’n khal vel hlak inla khawm Pathien chu iengkim chunga roreltu anih ti hrezingin lunghnȗla kȗr inkȗk el ding ei ni nawh. Jacob khuolzin angin harsatna tlanhmang san tum hlak inla khawm thlaler hmun rinum laitak hin Pathien chun ei khuolzinna lamtluonga mi kei ṭhuoitu dingin a vantirko a hung tir chȃwk hlak. Krista kross hmelma haiin min huol vel in, damlai lusȗnna leia lungai ngȃwi ngȃwia um chang ni haia khawm Jacob anga “hi lai hin Lalpa a um” ti hrietsuok a pawimaw hlak anih.

Elisha le a rawipa hai chu zingkhuo a hung var chun Suria sipai tamtakin anlo inhuol vel vawnga, siehlawpa lungngai thlaphang khek rawl chun “En rawh pu, iengam thaw tang ei ta?” tia khek in, Elisha ruok chun “Ṭi naw rawh, eini tienga ṭhang hai chu anni tienga ṭhang hai nekin an tamlem anih” ti malama Lalpa kuoma a ṭawngṭaina chu “Aw Lalpa, lunginsiettakin a hmu theina dingin a mit sukvar pek rawh” ti anih. Harsatna le lungngaina hai leia chau ngȃwi ngȃwia hringnun ei hmang lai hin Pathien malsawmna ei dawng hai hmuthei dinga ei mit sukvar ani theina dinga ṭawngṭai ava pawimaw ngei de aw.

Hi khawvela ei hmangai nu le pa, unauhai in natna khirkhan tak tak tuora an umlai hai dam, eini ngeiin ei beisei naw angtaka harsatna ei tuok hai lei dam hin lungngai mitthli a tla naw thei nawh. Ei hmangai lȃina hai in fam muol an liem lem hin chu an sȗlhnunga ṭap sillai puon ang bang a harsa. Khaw nghatna tieng tieng ami nuisan tu hmȇl vawng anga an langchang khawm a tam in, thlamuonna thucha hai mi hnem theiruolloa pȗrdo khawm a awl hle hlak. Tirko Paula anga vawithum lai a harsatna la kieng dinga a ṭawngṭaina dawna a umna “Ka lunginsietna I ta dingin a huntawk” anga lungawi thei hai ruokchu vangnei an nih. Chuleiin, ei khawvel damlaini haia sukrinumna leia harsatna tuipui infȃwn vel kara lungngȃina sȗmpui zȋng hnuoia ei leng lai hin chatuon khuo var nghaka tuor liem el ding ei ni nawa, nitina hnena nun chang theina dingin Pathien lunginsietna leia a malsawmna hai ei tiem thiem chun lawmnaw thei ding hrim eini ngai nawh.

“With Jesus in the boat through the storm we can smile”
Dated:04/08/2014, Gurgoan, Haryana

Read: 1618

Leave a Reply