Kha tleitiri khan! A mi lo hmangai zing si!

                                                             – Darsanglien Khawbung

Anih, nuom hun hun a, lekha hi hei zieka, ṭha tak tak hei phusuok el hi thil awl ai lo tak chu a ni hih. Kha chen kha lungril a ieng dang reng ngaituo thei lovin ka naupa le kan buoi sunni tlak zak zak a. Sin ropui tak thaw chu ka ni hrim hrim;  kan nu lawm zawng tak a lo ni bawk le, thaibawl ti ṭawngkam chu ka dawng in zing mal mal tho, anachuh, mani nauhai dawna thaibawi ni chu ka thlang kumkhuo tho tho ka ring.  Ka sanghai nau a mani, dawn lang thaibawi hlaw tho ka ti’m aw; ti chu ka buoina a la nih.

Kum 2006, kum tawp December 22, zantieng Christmas hmang dinga veng tieng fetumin dar 6:00 pm chun, Bawngkawn, Aizawl a Tipaimukh tieng fe ding Sumo ka hei biek chun, an lo khat ta ti ti el a, nisienlakhawm renga, mani khuo a Mas hmang nuom seng baka,  a lo um ta hai tlawmngaina leiin an mi lan chuong tir ve hram hram a. Aizawl a inthawka kan hei suok chun, ṭawngṭaina hmun kan hei tlunga, kei ni lai ka lo upa tak chu ni in, ṭawngṭaina nei dingin an mi ti a. Ka hei ṭawngṭai zo chun, hlim takin kan tlan sunzawm nawk ta pei a. Nunghak le tlangval le naupang pahni lai kan ni leiin a tu el khawm chu kan hlim tlang hle a. Christmas hla inring taka tape a ngaithlak pum chun, kan tum ram chu kan pan ta char char a. Kei ni lai chun  nunghak pakhat  to ṭawk ṭawk hin a lo um ve zinga, ka bul ah ala hei ṭhung nawk, ka umna chu an fuk hi ka ti em em a. Chu lei khawm chun, ka hlim bek bek el a nih. Nisienlakhawm, kei kha ṭawngṭaina a, inhlantu, tluongtaka kan tum ram kan tlung theina dinga, hnitu kha ka ni si.  Ka lungril tak chun, hei hneng deuva, a thu’n a zir chun, hei kuo el khawm kha ka hniel bek chun ka ring naw a. Amiruokchuh, iengkim hretu le hmutu chu ka ngam ngang naw leiin, ka ngaituona chu a thamral ta lem a.

Chuong a, zing khuovar ṭhak chen kan tlan hnung chun, kan tum ram, chu kan hnai ta sau sau a, lampui sira, parnem, hlo hmarcha parhai chun Chritmas lung a min len takzet chu ni ngei tawl a tih, phur fahran in Mas  hla chu kan hei sak nawk tawl a. Chuonga kan hlim lai tak chun, a ṭhen in an tum ram an tlung ta a, keini ruok chu darker chanve lai kan tlan hnung chun, kan khuo chu kan tlung ta a. Kha Tleitiri ve kha chu, khuo danga Mas Hmang dinga hung ani leiin ami ṭum san ve ta a.

Chuonga Mas hai ahung inherliem chun, ka ruolpa ka ngainat em em le kan college kai lai a ka bufai zawrna hlak J.Hmingchunghnung Infimate  le thaw ding dang kan neinaw lei chun, va leng ei ti ti in, khuol rama chun, chu nunghak hmelhriet, a hming ruok chu hriet lo chu kan va pan ta a, a lo fel em em a, motor a ruok khan chu, anrui nasa leiin biek mumal thei a lo ni naw chau lem ani ti ka hrietsuok a. Hlim taka hohlim in hun kan hmang a, kan Mobile number hai inpe in,  ei in biek hlak ding a nih tiin kan in mangṭha tawl ta a. Kum hai a hung thar chun mani tum ram seng chu panin  sinhai chu kan ṭan nawk hnung chun, kha tleitiri number ngei an thawk khan call ka dawng ta nawl el a, Aizawla a hung tlung nawk ta thu a mi hung hril a. Chutaka inthawk chu, nitin vawikhat bek hi a mi hung biek zie ta hlak.

A lungril ka hriet naw ang bawkin ka lungril a hriet naw a, chu el khela, hmangaii ka nei lei chun, ruol ṭha biek baka ka biek ngai nawh. A chu kum 2007 chun, Mas hmang dingin, ka hmangaii  chun an venga a min cha a, kei khawm chun phur takin, chu kum chu, ama kuoma Mas hmang in tuo dang reng kan ngai nawh.

Nisienlakhawm, chuong hun po po suong chun, nikhat nihni bak ril lovin, kha Tleitiri khan a mi biek zie hlak. Vawikhat lem chu ka hmangaii le kan umlai a mi hung call a, “ Hmangai deu el ka nei a, anachu, iengkhawm akuoma ka hril ngam si nawh. Iengtin am ka thaw ding mi hung hril ta”, ami ti chun, ei hmangai hai chu ei hril el a, inzak ding a um le, mi hmana a hmangai naw tu hai hmangaina an sawn naw an hni ka ti pek a. Chu zo chun, ka hmangaii le bawk chun, hlim takin kan um nawk ta a. Nisienlakhawm aw…..kha Tleitiri khan a mi biek a la ṭhul chuong ṭhak nawh. Tu lem kan um ti hai chen le ieng leia, kha hmun a khan Mas ka hmang a mana ti hai chen a hriet fai vawng vei leh. Top-Up hai chen chu ka phone-ah ami hung thun pek a, ka ta dingin an phal em em el si. Hmangaii dang ka nei lei am an ding Ka Hmangaina mit var thei em em zie le ka zei zie chu ka theinghil ṭhak a, kha ṭawngkam ka hrietthiem thei ṭhak naw kha. A hmangai nei thu bawk chu kan inbiek zatin a hril sa zie a. Chuonga, Mas hmangzo chun, ka umna tieng bawk chun ka kir nawk ta a. A umna ah chun, leng dingin a mi fiel leiin ka va leng ta a. Kar hni hnunga an vengtieng Burma ram tieng an fe ding thu ami hril a. Ava zie naw de…ei in hriet ṭan chau a, ngai I um awm de ti in ka dawn a, thingpui hai kan dawn zo chun, fe zai ka rel nawk ta a. Sei fe a mi hung in thla hnung chun kan in mangṭha ta a. An fe ding ni a hung tlung chun, kan thla chu ami phuot tlat el ta a. nisienlakhawm, bahara ding ka neinaw el baka ruo a sur sep sep a, an umna le ka umna inkar a hlat em lei chun ka fe thei naw ding thu in ka hril a. Nisienlakhawm, ami hung  call ta ngat ngat a, au dam a mi hung in call tir a. Amiruokchuh, ka van thla thei ta chuong nawh. Lampui intluon in signal a umna hmun phawt a inthawk chun, ami hung call a, chu ni July 10/2008 chu, ama anthawka nikhata call ka dawng inzing ṭum tak a la nih. Chu taka inthawk chun ani, kei hi a mi lo hmangai a ni el di’m maw? An naw le ieng leia, hieng lawm lawm a ami ngaina el am ni tang ka ta. A ngaizawngpa le hin kan in ang am an ta ding maw, ti hai chu chu ni chun, ka lungrila ka ngaituo ta a. A zana chun imu inhnik takin ka in a, a tuk zing dar 9:00 am vel a chun, kha tleitiri number ngei an thawk khan call ka dawng nawk ta a. Chu rawl zet chu a ni, ami lo hmangaina rawl chuh, an hnik fat fat rie chu ka na a hin a hung lut ta a, hun iemanichen chu ṭawng loin a um a, iem anta a ka ti khawm chun a ṭawng el ta nawh.

Hun iemani chen hnung chun, “Ka fe ding khawma mi hung inthla nuom lo che, ka lungril I hriet thei ding khawpin, thu tamtak ka hril che in ka hriet a, ieng lei a I mi hriet thiem thei naw am a na, I kuoma ka umdan le ka ṭawngkam hai hresuok theinaw khawp rak ding che in ieng ang mawl na in am, anthuom che a, tu hin tiu Burma le Mizoram ramri kan tlung ta a, tu hi ka rawl I hriet nuhnung tak na ding le I rawl ngei ka hriet tawp tak na ding an ta ka ti leiin ka la hung call hram hram che a ni. Nisienlakhawm, kan veng ka tlung huna, hung call theina ding che ka nei chun, khawvela ka mi ngainat tak nang hi, hung hrezing ka ti che a hung ti a.” Chu phing chun, kei chu nawt harin ka um ta a, nisienlakhawm, ama kha ka hmangai ti na ni lovin, mi hmangaitu rawl le umda chu, hmangaina anthawk bawk naw chun hriet thei a lo ni naw ni hi maw, ti in kan ngaituo a, ama hrim hrim chu ka ngaina, nisielakhawm, Ka hmnagii ding khan chu ka lo ti naw deu chu a ni kha. Chu, Tleitiri chu, ka lunginsiet in ka lainat takzet , asanchu, Kha tuiral a tlung chen khawm khan kei te lul hi a mi la’n nghil naw lei a nih.

Read: 921

One thought on “Kha tleitiri khan! A mi lo hmangai zing si!

Leave a Reply