Dengue Fever

      1 Comment on Dengue Fever

Dengue Fever

Dr. Janet Thiek Stephens, M.D, Specialist, Medicine Dept, SDNH, Delhi

Tulai Delhi khawpui le hmun dang danga hai thokang se leia natna – DENGUE le MALARIA khawsik leia na an um tan nawk ta a. India Hmar Sak  mi ngei khawm tukum Delhi le Bangalore ah Dengue leia hringna chân hiel khawm ei um  tah, a pawi khawp el. Hieng natna hai laka inthawk hin mani invêngtha chun ei him thei a nih. Dengue a na hi India Hmar Sak –Guwahati, Imphal, etc. tieng khawm hmu ding an um ve tan tah a nih . Ei sung le kuo vêng tienga um hai khawm hi natna hi ti thawng el lo a, tha taka inenkawl chun dam thei ani zie le Dengue leia damnaw nazawng Thisen/platelet pek an ngainaw zie inhrilhriet a tha.

‘Dengue’ hi virus hrik lei a nih a. Hi virus hi chi 4 a um. Hi hrik hi thokang chikhat ‘Aedes’ in a pâi a, mihriem hi natna lo invawi lai a sê hnungin, mihriem dang a sê nawk pha leh, natna a hung siem hlak  a nih. Hi thokang hi, ‘Tiger mosquito’ ti khawm a nih, a san chu, a pum le a kê hai a tiel leiin. Thokang hi an intuia inthawka an puitling chen sûng hi ni 7 vel a nih. Tui faiah an intui nuom a. In sung, mihriem chengna hmun, thimtham lai an cheng nuom a, tui tlâwmte intlinga hai an intui thei a nih. Chu lei chun, in kawl vela tui intling- cooler, bêl, flower pot, plastic no/bag, motor tyre, hmunhnawk intling, inchunga tank, inbawlna hmun, etc a hai hin an tam a. Ruosur zo hin an pung nasa hlak. Sun lai mihriem an sê nuom hlak bawk a nih, abiktakin zingkhawvar intan le zantieng khuo inthim tâwmin.

Natna inlang dân tlângpui chu hienghai hi an nih:

1. Khawsik ni 2 a inthawka ni 7 vel chen

2. Lu nâ, mitmu nâ, pangkham, ru le chang nâ.

3. Pang a hai chi te te a sen (rashes) hung um.

4. Hnar, bau, zun, pang a inthawka hai thisen a suok thei a, rîl a thisen pût leiin êk khawm a dum thei a nih. Nuhmei hai chu an thi pût a tam thei bawk a nih.

5. Phing na /mar (hi hi tam takin an nei tlangpui), luoksuok, thuokinsam, (Hieng hai hi khawsik a inthawka ni ngana vela inthawkin a um hlak).

6. Luhai, khawmuol hre lo, Blood Pressure in hnuoi, so them mumal theilo, thlan suok rak rak, etc.

Mihriemin a vawikhatna a nat hin Viral Fever pangngai angin a na a, thisen suok, BP in hnuoi, ti hai a nei ngai rak nawh. Virus dang an vawi nâwk pha hin, a taksâah a hma a, antibody lo um sâ le tuta virus lut thar hin reaction an nei a. Hi lei hin Platelet, ei taksâa thi suk chât tu, a suk tlâwm a, nuoi khat nekin a hung tlâwm hlak a nih. Platelet hi dân naranin khawsik a inthawka ni 3, 4 hnungah, a tlâwm tan hlak chau a nih. Amiruokchu, Platelet hi darkar 6 danah an siem thar nâwk pei a, chu lei chun mi tlâwmtea chau Platelet hi an hnuoi vieuin, mi then tlâwmteah thisen a pût/suok hlak chau a nih.  Hi baka hin,  thisen zâm a inthawkin Thisen tui(Plasma) a pût a, Thin, Mît (gall bladder), Chuop, etc hai an vûng hlak bawk a nih. Hi lei hin thisen zâmah thisen tak a tam ta lem a, Thisen tak (Haematocrit) level a hung in sâng a nih. Thisen zâma hin tui (Plasma) a tlâwm tâk leiin, BP a hung in hnuoi a, so (Pulse)  khawm them mumal thei loin a um hlak a nih. Ei hriet dinga pawimaw  pakhat chu Dengue a Lo Na ta sa hai khawm kha, Virus Chi li an um leiin, an na nâwk thei a nih. Dengue a hin Platelet hai sinthâw(function) -thisen suk chât sin khawm hi a sukbuoi leiin, Platelet inhnuoi rak naw sien khawm, taksâ a inthawkin thisen a pût thei tho a nih.

Khawsik ni 2 vel a re hma le a re hnung ni 3 vel chen hin, thisen zâma inthawkin plasma hi a pût dawk nuom a, platelet count khawm a tla hnuoi hlak bawk leiin khuosik a re hnung ni 3 vel chen, Platelet count le Haematocrit nitina en a tha. Dân naranin nat sûng hun hi ni 2 a inthawka ni 7 vel chen ani tlângpui. Hi natna a inthawka damsuok zo hnungin kâr khat vel chenin mihriem a suk châu/zawi em em thei a nih.

A. INENKAWLDAN:

Dengue fever sukchieng na hi MacEliza test a nih a. Hi test hi khawsik intana inthawka ni 5 hnunga thaw ding a nih. Rapid Antigen Test khawma khawsik intantir a inthawka ni 5 chen thaw ve thei a nih, anachu, hi test hi virus dang leia natna a khawm a positive thei tho a nih.

Dengue virus thatna dingin tu chen hin damdawi le vaccine hmu suok ala ni nawh. Thingfanghma hnâ/ kêl nenetui, etc mi tamtakin anin hril hmû chu Dengue a hin a tangkâina scientifically research a  proved ala ninaw bawk a nih. Platelet count 20,000 /cumm chen a ni khawmin, BP a pângngai a, thisen a suok/pût naw chun, iengkhawm inlâu ding a um nawh. Amiruokchu, platelet 1 lakh vel a inthawka 50,000 vêla a hung tla hnuoi dâwr, annnawleh thisen taksâ a inthawk a pût/suok  le BP an hnuoi chun thataka monitor (enkawl) a ngaia, hospital pan vat a tha.

 1. Um hâdam a pawimaw.

2. Pang suk deina dingin –Paracetamol (500mg) puitlingah le naupangah 10mg/kg body weight darkar 6 dana pêk thei a nih. Puon deia pang po po lu chau ni loin dep ding. Aspirin, combiflam, etc fâk lo ding.

3. Oral Rehydration Solution (ORS), tui, thei tui, etc thei ang anga dâwn ding.

A hnuoia ang hi a um chun Hospital pan vat ding:

Khawsik insâng taluo, khawsik lai zing /khawsik re hnunga Phingna dam thei lo, inluok nasat leia châu, taksâa inthawka thisen suok/pût, pang chite tea hung sen (rashes), khawmuol hrelo, inthlan nasa, zun a tlâwm, lu inhai, thuok insam, khawsik ni hnih, ni thum vel a re hnunga khawsik hung um tan nawk, kei(seizures)etc. Abiktakin, naupang Dengue a na hai hin an natna an hril fie thiem ngâi naw leiin, chîk taka nu le pa le puitling haiin enkawl le ngâiven a tha. School khawm an khawsik a re hnung kârkhat vêl bêk inchâwl hâdam tir a tha.

Dengue leia complication hai- Platelet tlâwm leia Thisen pût le Thisen zâm leak nuom leia inthawka-BP inhnuoi le thin, mît, chuop invûng leia phingna êm em / luoksuok êm em, thuok insam hai hi Khawsik a re hma ni hnih a inthawk le a re hnung ni thum vel sung hin dân naranin a um hlak leiin khawsik a re tah ti lei ela ngaisam ding ani nawh.

 Viral fever pângngai angin a tam lem chu kâr khat hnungah an hung dam el hlak anih. Mi tlâwmte a chau complications hai hi a um hlak a nih.

 B. INVENG DAN:

1. Tui intling, hmunhnawk reng reng pei ding kâr khat ah vawikhat bek. Cooler, bêl, no, bottle, par bêl, tyre, etc a haihi enkai ngun a tha tui intling a um le um naw. Cooler hmang lo a ni chun, in ruok ding.

2. Tui intling pei thei lo chu thau (oil) eg. kerosene, petrol, hair oil, cooking oil- thirhâihaw hnih kârtin vawikhat sung ding. Annaw khawma, Temephos granules thirhâihaw khat kârkhatah vawi khat thlâk ding.

3. Thokang se laka in vêng fimkhur- Thosilen hmang ding sûn le zanah, cream (odomos) pang inlangna (exposed parts) a hai nâl ding , coil, electric liquidator (all out, etc) hmang ding, zakuo ban tluon hak, kekawr tluon bun,etc.

4. Insunga thokang an lût nâwna dinga kawtkhâr, tukvera hai lên(net) zar ding.

5. Thokang thatna dingin Spray (Hit, odomos,etc) hmang ding.

6.Mosquito racquet or mosquito zapper (China suok) khawm hi thokang thatna ding chun a tangkai.

7.Tuisiekhâwlna(Water tanks/Overhead ) tanks hai det deua sîn ding.

8. Damnaw enkawltu/kan tu, hospital a sinthaw Doctors, Nurses, etc hai invêng that le fimkhur a tha. Asanchu,Hospital tam lema a hai hin Aedes Thokang hmu ding an um el bâkah, damnaw haiin Dengue hrik/ virus an pâi bawk leiin.

Malaria  leia khawsik khawm hi thokang chikhat Anopheles se a inthawk bawk a nih. A hrik hi protozoa chi 4 a um a-chuong hai chu P (Plasmodium) vivax(PV), P .Falciparum(PF), P.Malariae le P.Ovale a nih. Delhi le a sê vêl ahin chu PV a tam tak a, a dawtah PF a nih. Tukum khawm hin Delhi ahin PV le PF  a khawsik an um nuol tah. Northeast tieng ruok chu PF le PV a um ve ve. Malaria hrik thatna ding in damdawi a um leiin, in enkawl vat a tha.

Hi natna inlang dân tlângpui chu – taksa in dei a hung ti phawt a (cold stage), chun sikinhning(chills) in a hung um a, chun ,pang a hung sa tan nâwk a(hot stage), chu zo phât leh thlantui in a buok hlak a nih. Khawsik hi dân naranin PV Malaria a chu hunbi neiin an lang hlak. PF Malaria a hin chu khuosik hin hunbi a nei chuong ngai lêm nawh. Hieng baka hin, lu nâ, um inhawi lo,pangkham, luoksuok, lâ(spleen) le thin(liver) a hung sâwt chun a hung lien hlak. PF Malaria lem hi chu a thawk hrât a, inenkawl vat naw chun, thluok, kal,etc a tawk thei leiin ngaitha lo a tha, thîna khawm an tlun vat thei a nih.

Mihriem thisen zâma hin Red Blood Corpuscles(RBC) a um a. RBC sunga hin Haemoglobin a um nawk a. Hi hi, ei taksa bung hrang hranga Oxygen petu a nih, hi lei a mihriem ei hring/dam a nih. Malaria hrik, a bikin PF hin, RBC hai hi a suk kawi a, Haemoglobin khawm hi a suk kawi bawk a nih. Hieng lei hin, Haemoglobin a hung tlâwm a, Malaria invawi hai hi enin  an da a, a then lem chu thisen pek khawm an ngâi hiel hlak a nih. Haemoglobin kawidar leiin Mîtliem (jaundice) a um thei a. Thin a tawk lei khawmin Mitliem (jaundice) a um thei bawk a nih. Mi tamtakin MALARIA LE JAUNDICE hi natna dang dang sawnin, Malaria damdawi fa loin, Jaundice hi an enkawl hmasa lem hlaka. Hi lei hin, tamtakin hringna an chân pha tah a nih. Thluok a tawk leiin khuomuol hrelo, kei(seizures), tawng invâi, etc a um thei bawk a. Kal khawm a suksiet thei bawk leiin, zun hai a hung tlâwm a, taksa a toxin (taksâ le thisena hnawksak/bal) hai zunah a suksuok  thei tak naw leiin, thuokinsam, pang invûng, khawmuol hrelo, etc hai a um thei a nih. Hieng hai hi a um chun Hospital hnâi tak pan vat a tha.

PV hrik hi Delhi le a se vel a hin chu Chloroquine in a la that theia, course kima fak ngei ding a nih. Hi baka hin, a hrik a bo fel vawng na dingin Primaquine ni 14 sung fak ngei ngei ding anih.PF a ruok hin chu Chloroquine hi a thawk that naw leiin, damdawi chi hni vel bek fak kawp a ngai hlak. India Hmar Sak a ruok hin chu Chloroquine hi PV ah a thawk tha nawh.

Hieng natna a tawizawnga ei ziek lang hai hi ei chêngna insûng,tuol,office,school,mani  sinthâwna ,etc, hmuna hai Thokâng pung ding ei khap tha phawt chun hi natna hai laka inthawk ei him thei a nih. Mitin fimkhur seng ei tiu.

(Delhi Thurawn, August 9, 2015)

Read: 1394

One thought on “Dengue Fever

Leave a Reply