PI NIENGLAWMKIM LEH VAIMIM BUT

      2 Comments on PI NIENGLAWMKIM LEH VAIMIM BUT

PI NIENGLAWMKIM LEH VAIMIM BUT

– H.Zate

Ka hêlna le ka tumna a sawt ta bawk a, Facebook a inthawka a naunu be hmasain a hun ding kan ruota, sienkhawm, kan hun ruot ka baw pel hnungin hun dang ruot nawkin, ka tum ram chu ka tlung thei hram a. Kum 2015 Thlazing ni 8na niin zantieng dar 4 an ri chu Hmar hranghlui hlasakthiem Pi Nienglawmkim Sungte inpawlpui dingin Hmarkhawlien chu ka pan ta a. Ka bus chuongna tak hlak chuh kan hei sip em em khawp el a. Silchar le Hmarkhawlien inkar ka ngir tluonsuok vang a nih. Pailapool a inthawk thungna-ah ka thung ve thei hram a, a lum bawk ka sawl zekin ka hriet. Hmarkhawlien ka tlunga ka ruolhai Zalorthang le Joseph Darngawn felna zar zovin Ni 9 Thlazing (August) 2015 zantieng dar 2 chun hlasakthiem, hnam hmangai em em tu Pi Nienglawmkim Sungte le chun kan inpawl thei ta a. Ka ruolpa Joseph Darngawn le chun An inah Kan hei lut a, inleng an lo nei rawn khawp el a, an mi hmu chun an suok diel a. inzak a um ang reng. Kan inhril hnung chun indawnna tieng kan lut tan ta a.

H.Zate & Pi Nienglawm | Photo: Joseph Darngawn

Hmarhai khawvela hlasakthiem em em Pi Nienglawmkim Sungte chu tu khaw hriet lovin Pu Upa Lalneilien le Pi Henkhawkim hai inkarah Nau Pasal pakhat le Nuhmei 4 laia pakhat ni dingin Chandikhal, Cachar, Assam-ah 1964 September 22 khan hi khawvel rinumin hi hmu dingin tap pumin a hung pieng ve ta a. Rinumna tamtakin a bawm hi khawvel a hin rinumna tawn ngamnaw leia hlawsam bik ni nuom lovin a hmaa thil tlung chu a hmasawn ve mawp mawp a, chulai zing chun a ta dinga Khuonu thil ruot chu a la hriet thiem bik nawh. Hmar sul suok laia hla sakthiema inlar ala ni ding ti hi a nu mang le ama ngaituonaa khawm a um phak nawh. chuel khawm chu ala ni le, An pansakhai khawmin an mangsiet chang khawm an lo hmu bik dêr nawh. khawvel hi inher peiin rinumna le harsatna hai inhersuok puiin sum sa tak kara khawm Ni eng mawi tak a um ti hre a thlir zingtuhai ta ding chun hlawtlingna hi a lo um hlak ani hih. Pawl 7 inchukin pherzawlah a um a, chulai chun a khuosawt chu khaw hnawm a rama chun inhnawm suonlamin lungpui chunga inthungin hla a sak hlak a. chuonga a hla sak chu a ruolhaiin lo hre fukin Pawl 7 ani kum Pherzawl a a sikul kaina-ah Farewell Function a chun hlasak dinga ruot ani a . Khup inrawk puma sakin chu chu hi khawvela a pieng hnung le a thi hnunga mipui hmaa hla a sak hmasatak na ani ta anih. Inchukna tieng Pawl 10 zovin Kum 1982 khan AIR Imphal-ah a rawl khum vein Radio Artist a hung ni ve ta a, hi taka inthawk hin tuchen hi a hung tlung ve an tah.

Radio-a Rawl khum kum : Kum 1982
Radio-a hla sak hmasatak chu Pu Rev Thangngur-in a phuok ‘Siar chungah Sieng in Remtu’a ni a. A hei saka a la thiem hler hler khawp el.
Album Hmasatak siem kum : 1982 Radio-a inlar hnungin
Album Hmasatak hming: ‘ DAMLAI THLALER’
Album Buotsaipuitu: Pu Darthanglien Ruolngul
Album siem zat: Volume Sawmnga le Paruk siemin Ruonglevaisuo Collection-ah Lengzem/sai hla pahni a sak.
Hla sak laia dittak: ‘Ka umdan le Ka chan ka thu an’nawh’ Pu C Lalthlunglien phuok. Hi hla khawm hi hei sak sinin a rawl a la tha vang vang khawp el. A thiem veng veng ngei el.

Pi Nienglawm | Photo: Joseph Darngawn

Kan inpawl ran lai chun kan la hei titi kuol vel a, A nauhai pahni an hung inlang deu ran bawk. Ama-ah nekin a nauhai-ah ka lungril a fe lem chang a tam teu tei khawp el. Dittawk phawt ei tih. Kan inpawldan kimchang, Album an siemdan kimchang nuizatum, bengvarthlak si, hla sak dinga a bei dan, A thawkrimna le Hnam ta dinga a lo vakvaina le a hun tawng hlimum le tulai thalai ta dinga nuizatum le Hranghlui hai ta dinga lung sukleng vang vang tu ding chu Manmasi Digest-ah lo inchan rawh.

Chuonga kan inpawl zo chun Thlalak tiengpanga ka suong em em ka ruolpa Joseph Darngawn chun ‘Photo Session’a puong a, kan lan lak a. a tawpa chun Vaimim but ngei retin tinzai kan rel ta a.

Read: 1925

2 thoughts on “PI NIENGLAWMKIM LEH VAIMIM BUT

  1. Hminga Songate Post author

    Ka naupang lai deu khan chuh Pi Nienglawm neka hlasak thiem hih um thei dingin ka ring ngai der nawh. A casette siem a hla tam lem hi ka nei naw a, lakna ding hrie dam ei um?

    Lusei tawnga a sak khawm a um ni’n ka hriet.

Leave a Reply