MISS, I LOVE YOU.!

      1 Comment on MISS, I LOVE YOU.!

Ziektu: H.zate
Hmar Rûn

Ka damnaw leia kar khat Sikul ka kai naw hnungin Thawtanni tuk chun ka ruolhaiin mi hung fielin kan sikul pan chun kan fe a. Chuonga kan sikul lama kan fe lai chun ka ruolpa chun, ‘Miss thar ei neia a muk a ni aw!’ a ti a, ka ruol danghai chun, ‘A ni ngei, a muk a nih’ an hung ti ve bawk a, ka awi rak naw leiin ‘tha ka ti zawng ni naw nih’ ka ti pek a, an mi chum tawl a kan fe pei tah a.

Sikul chuh tlungin klass kan lak tan tah a, ka la damkawr leiin ka har pei nawh. Sienkhawm, kan inchuktirtu thar a hung lut meu chun ka mit a lak nghal a, ngui deu kha ka har kawk el. Ama ang renga hmeltha atakin ka la hmu ngai nawh. A pieng, a ke, a mal, a awm bawr, a sam chen khan nal ka ti vawng el a nih. A hei innui zawnga a bieng vawi tienga biengsum inkhur kák hung inlang hlak mawl kha a nih tuor intak ka ti chuh. A klas lak sung khan ama naw chu ka ngaituo thei nawh. Ka kawla inthung ka ruolhai hlak chun ‘zan khat chau bek chu kawl chak a um’ an lo ti ve mek bawk.

Chu nia inthawk chun ka lungrilah kan Miss chau chuh ka lungrilah a um tah a. Lekha ka tiem leh lekha-ah a hmel ka hmu a, ka mitthla-ah cham zingin ka suongtuona po po a hluosip zova mangah ka hmu chamchì bawk. A ma ka dit leiin a sabjek chu ka thiem thei hle a, ama biek nuom hin ka hmanhlel hlak. Sunah sikulah ka hmu a, zanah ka mitthlaah. A mit dum sieuin a hung indum a, Hmar nuhmei thuoma a hung inthuom changa nal ka ti thei zie kha aw! A biengsum chu thuhran a hner sá tap el khan ka mit a lak a, tlawr sieu-a a hung nãl lem khan chu ka chil ka lem khawl khawlh hlak. Test kan nei a ka thaw that leia ka bieng a hmet zau dam kha ka sukfai phal ta naw vang a nih.
Kan miss zûn phur pum chun nun ka hmang a, a chang chun sikul lampuiah kan intlawn hlak a, inhawi ka ti thei hle. Ni khat chuh zingkar ka tho inhnu leiin sikul ka fe inhnu a, inhmaw deuva ka felai chun kan miss chuh ka hmaah puonbil sen le zakuo var inbelin a lo fe ve mek a. Kha ni khan chu nal ka ti de aw. Va hnawt phain a ruol chun ka fe a, ‘i va’n hnu de’ a mi ti a, ‘zingkar kan buoi deuva’ ka ti ringawt a. Intlawn pum chun kan hohlim a.
‘lekha i tiem tha am’

‘aw, tha ve tho, ka dam chun’
‘ in exam a hnai tah hi tiem tha hle rawh’
‘awle, miss i nal ie’
innui sai chun ‘naupang ler naw rawh, ka nal ti chu ka hriet annawm. I inchuklai ngaisak rawh.’
‘miss, hril ding che ka nei a’
‘iem hril la’
Sikul gêt kan tlung tah leiin ‘miss, a ngai nawk nawh. Have a nice day’ ka ti a, kan pindanah ka lut san tah a.
Chu ni a inthawk chun kan inpaw ve deu a, ama khawmin a mi ngaisak deuin ka hriet a inhawi ka ti thei khawp el. Kan pawl inruolpui kan ruolnu pakhat chun kan miss ka dit zie chu a lo hrietfuk deu leiin a min dawn tawp el a, kei hlak chun ka hril ve el bawk. ‘i awm naw taluo, ei miss a ni hih’ a ti a, ka lu-ah a mi ben chawr a, a mi maksan dei a, inhawi naw ka ti ang reng hle.

Ni tin el hin tha ka ti zuol a, ka hmu ngun leh tha ka ti zuol a, ka hmu naw le hlak ka ngai naw bawk si. Ka hmu le hlak ka biek tha ngam ngai bawk si nawh, a buoithlak ngawt el. A ma leh khan chu hremhmun khawm a zieum deu ka ring a, a hmel ka hmu khan chu ka hlim ngawi ngawi el a nih. Ka tieng nghaa a biengsum inlang tai a a hung innui sieu dam kha mawi ka tiin ka hlimna bulpui a ni hlak si. A chang chavai ringawt khawm ka ta ding chun ennuomum a tling a, a min chuktir malama a ‘Chalk’ chawi ringawt khawm kha a kutin a tawk leiin ka thik hlak. Inchuktirtu inthungnaa a thungna hnunga inthung ringawt khawm kha ka ta dingin hlimna le lawmna a ni lem zing si. Kan class teacher a ni hnung lem chun a fel zie ka hrietchieng zuol a, a lakah ka luongliem deu deu. A pen a hei se le a sam inleng sieu dam kha ennuomum a va hei tling chieng de aw.

ka dam naw leiin sikul ka fe nawh a, zantieng ka ruolhaiin an mi hung pana kan miss nal thu kan hrila kan hlim ve em em. Chulai tak chun kan miss chu tlangval pakhat leh an hung a kan innui lai a tawp chieng kher a, a mi hung kan kha ka lawm vieu a chuh tlangval kha ka thik tlat leiin lawm a kim nawh. Bei a hung chawi chuh kan ruolcham.chun kan fak a, chawmkhat hnung chun tlangval leh chun an suok nawk tah a. Ka ruolhai khawm chu an fe ve tah a.

Ka dam naw a inthawk kar 1 a liem hnung chun ka tha ve deu tah a, sikul ruok chuh ka la kai nawh. Ka ruolhai hung lengin kan miss nal le that zie bawk kan hril nawk a, ka ruolhai an inlawi hnung chawmkhata chun kan miss chu a hung lut a, fak ding dam a mi hung chawipek a, ka natna dam min dawnin ka pang a them a, inhawi ka ti zie kha aw! Sawt fang a um hnung ‘fe tang ka tih, lo dam pei rawh’ a ti a, chulaitak chun ‘miss’ ti le a kut chel ka’n ruol a. ‘iem?’ a ti a ‘hi la la, anachu, i suok pha le chau en rawh aw’ ka ti a, ‘awle’ tiin ka lekha fun thla khat vang ka kawl tak chu ka pek a, a mi suoksan tah a. Kan in a suok hnung chun bang awngah ka en zui kan panthlang a chun ka lekha ‘MISS, I LOVE YOU’ ti chu a tiem a, innui sai kan in tieng hung nghain ‘naupang’ tiin a so sap a a fe liem tah a.

22 November 2015, Silchar

Download H.zate Android Apps

Read: 2714

One thought on “MISS, I LOVE YOU.!

  1. Hminga Songate

    Hehe…thil pakhat ka hriet dawk chu tie. Ruolpa pakhatin an miss-nu khah tha a ti deu a ni awm a, I love you tiin lekha a hei thawn thuoi chuh. Sikul dang a deng rawk nghal.

Leave a Reply