SAIEP DIARY

      No Comments on SAIEP DIARY

SAIEP DIARY

Ziektu: Rama Ralsun

Biekin hawng ding fielna an puonga inthawk khan, iemani tia harsatna taluo a um naw ani phawt chun fe dingin ka lo insiem lungril deu zing a. Fûr lai tak ani bawk leiin, motor a tlung thei naw chun ṭhul el ding am ani aw ka ti deu lai zingin, kan umna laia ṭhalai iemanizat khawm ke a lâwn el dingin an insiem leiin anni ruola fe ding chun kan siem ve tah a.

Hun iemani chen motora kan tlân, kan ṭum hnung chun varuom-ah an mi lûtpui a. Field Superintendent-pa râwia fe kan ni leiin kawngkhata chu ka lung a la muong met tho a. Varuom kan zuk hrâw sei pei chun, ring bak zetin a lo awlsam hran taluo ta nawh a. A lo fe ṭhang hai kha chu kan hnawt phak ta naw khawp el! Vadung kawi 1/2 vel chena khawm khan kan hmu phâk ta nawh. Beidawng lem chu a um chuong hranpa nawh.

Chuong ang pei chun, lamsuk râwlkho ang deu dam kha kan zuk hrâw thla pei a. An nâl bawk, an thir bawk, kan tawl pei bawk, a buoithlak ve ang reng khawp el. Vadung indîl metna laia nga hai kha man dinga fe ni inla chu phur um khawp zet chu a nih. A châng leh tlanga dam kan lâwn kâi thûk, lamsuk ṭum lem kha chu zaperin a zo nawh, a ngawi lâwl lâwl el a nih.

SAIEP an tina tak, vadung sîr ve veh a sâi a ep (chep) na an ti khawm kan hmu a, cameraman ding an um naw leiin kan selfie nghe nghe kha ti! Ke le kâwng tung kham phira kan lâwn hnung chun, a khuo chu kan zuk tlung ta ngei a. Hotupa Evan. Lallawmthang-in “Saiep chu iengtinam i hmu le? I lo ngaituo dan ani am?” a mi tih a. Kei hlak chun ngaituo sek sek hman lovin, “In dam chu an hang bâwl ve bawka, ramhnuoi ani hi ti!” ka ti pek ve ringawt a.

Lampuia vadung kan hung hrâw laia ngamantu pakhat kan hung hmufuk lei khan kan Saiep fe hi a mi tuok sukburiptu pakhat chu a nih. Kan tlungna a khan vadung ngate kg. 1 a mi hung bun pêk thâwr a, bufâk chu a sukhnik ve ang reng khawp el. Midangin an khel neu neu laiin, hotupa Evan. Lallawmthang leh theitawp insuoin kan fâk zo thei hram a, a tui khawm kan hrâwp fâi rît!

A zâna chun Biekin la hawng lo ani bawk leiin, ei tirko-pa in-ah kan inkhâwm a. Electric um bawk lo chu, Solar bulb chite var riem riem sitvarin hun kan hmang a, ngaituona chu a suksei hranpa naw hle. Anni ta ding chun Electric pre-paid buoipuia insuk buoi em em a ngai ka ring nawh. Inkhawm ṭin chun kan lan pan khawm vel a, mihai ngainatna an nei ziet hriet theiin a um leiin lâwm a um kawngkhat hle. Chu chau chu nilovin, a zinga Biekin hawngna ding hmangruo lo va ngaituoh a Bazar fe dam an um a, inpâk an um hle a nih. An Bazar kaina hi anni chu darkar 1 dam an lâwn hlaka, fûr lai ani leiin lampui chu a pawr hle a. A fe ṭhang naw hai ta ding lem chun darkar 2 annawleh, darkar 2 ½ lampui vel chu ani ka ring.

A ram boruok lum ngaituo chun imu khawm an khawp hman am ani ti ding hielin zîngtho chu an inhma nâwk lawi bawk si! Lo nei le kut sinthawa fâk zawng tawl na na na chun, an thaw dan ṭhang khawm chu lo ni tang a ta. Nupuitepawp pakhat lem chu, a tho inhma taluoa an zingkâr hme ding torch light sitvarin ruotuoi a va khê hiel niin an hril! A tumru ve ang reng khawp el. Zingkâr ei la in bur bur tawl huna hin zing bu an lo fak khawp hieu ta hlak ani chuti! A boruok dei lai ana bufak a’nhnik deu an ti a khawm ni ta vêl a tih.

A zingkâr chun Biekin hawngna ni ding tak ani leiin, lungril takin phurna ruok rieu ka nei a. A zâna imu khawp naw lei le, lampui lâwnna pang sil hai ruok chu a bo chuong nawh. Ip set set lova hril ding chun, hrisel pangâi ta ding khawma imu inden deua in chu a harsa ka ring. Ka phone in network a man naw a chu, a temperature kha a tlâwm takah 32 degree vel ani ka ring. Chu khawm chu vân innim lai a la na, khawmuol ṭha pangâi lem chun a lum hle ding a nih. Chonga boruok lum zing laiin, misete hai hlakin intan lovin an mi chip zing bawk a, a zuk hril dan khawm thiem a harsa ie, hieng kuhin ani el a nih! Mobile phone hlak chu battery bawng angin ei pâi el kha ana!

Biekin hawng khawm kan zuk ṭan mêk tah a, ka thei ang angin camera chu on-in thla dam ka lo lak veh a. Field Superintendant in hawngna a nei zova inhlânna a nei zo chun, inkhâwmna kan nei zawm nghal a. Field Superintendant chun thuhrilna khawm a nei nghâl nghe nghe.

Saiep kohran hai inpâk an umna le an tum a rû zie chu an Biekin bâwlna a hin an langin ka hriet. Tripura Ramthar Field in nikhat hnatlâng neia a thawpui bâk po chu anni khâtin an thaw zo vawng a nih. Kohran member puitling tak, kohran hai inrawi theitu ding umlo khawp hiela innâwi ni hai sien khawm, a thawa thâwna kawnga chu an inpêk hne hle. Pathien malsâwmna tamtak dawng pei dingin ka ditsak hle el!

Inkhâwm ṭin chun a kohran haiin theipatâwpa an lo buotsai ruoi chu ṭhe dingin kan inbuotsai nghal a. An hme siem chu ka du tak pa ni naw sien khawm, lâwmna thil ani leiin inhnik taka fâk dingin lungril ka siem a. An hme suong chu a awlsam dan taka hril ding chun, “Ruotuoi le Vawksa tel le Ai-eng leh an but” ti el thei ani âwm! Pathien zârin an hnik naw sie hran taluo nawh. Ruotuoi hi a tam em em vai leh, kei ang bawkin an lo va du tâwl ngei ka ti lungril ringawt a!

Sâna thuhriltu ding Pastor John Matthai a hung thei naw leiin, Field Superintendent chu ama hunah thuhrilna an pêk a: zâna Field Superintendent pa hun chu an min hlân veh a. Ditsak taka an min hlân khawm nisien, harsatna tlâwmte a um leiin rinum ti rûk rieuna ka nei a. Pathien thu anni ṭawng ngeia hril theilo chun ani ang takin an pâw naw ding a nih ti ka hriet zing a. An hriet khawp chau, hmar ṭawng awlsampa takin tâwite a zâwm inhawi tâwk chau hril dingin ngaituona ka siem tah a.

Zâna kan hang inkhawm chun, ka beisei naw ang takin hmar ṭawng hrie kawk lo hi iemanizat kha an lo um a. Hotupa Evan. Lallawmthang chu ṭawng inlet el dingin an ti tah a. Kan hang bei ṭan tah a, a thuhmahruoi lai kha chu nâm zatin kan hang hril thla pap pap a. Biekin thar nal le inhawi deu ei bâwla: nakie hin Wales ram, chanchinṭha mi hung phurlût pêktu hai angin a Biekin ah inkhâwm ding um naw pal ei ta a pawi ding a nih ti thu dam chu ka hang hril a.

Seminary a kan um lai, ruolhai khuo a dam chu ka thuhril hi ruol ṭhenkhatin an lo inlet ta hlak a. Chuong huna chun, English ṭawng ani bawk leiin sermon note kha fel diemin ei lo ziek hlak kha a na. Tuta ṭuma mi ruok hi chu a dangdâi bîk hle in ka hriet. |awng thiem naw hai khawma an hriet tâwk chau tâwite hril dinga ka ti ni lei khan, sermon note khawm ka lo siem chuong naw kha na. Kan hang hril pei chun, ṭawng inlet kâr chun ka hril zawmna ding dam kha ka lo theinghil mahri leh, a buoithlak ve ang reng khawp el. Ka ti nâwna tieng tieng dam ka hril kâi a, ka hrilsa dam ka hril nawn pei dam niin ka hriet. A tâwp a tâwpa chu, inchen nenga hril zoin kan la Amen thei hrâm ani kha! A hunin a phur suok ni ding a na, a mak hranpa nawh!

Thawṭanni tûk chun Makunda a Pastor John Matthai sir malam tumin lampui dangah kan fe tah a. Chu tieng chu an bazaar kaina lampui a nih a, darkar 2 vêl chu lam kan lâwn tho niin ka hriet. “A iengti dâna hienga ram kilkhâwr a hin khuo an lo va nei am ani? Sawrkâra inthawk mi dawng ang hamhatna hlak hmu pha ve si lo hai, electric takngiel khawm tlung lo hih!” ti’n ka lungrila ka ngaituona hai chu ka hril suok leh, “a hma chun rampui a na, an lo neina hai ah In an bâwla an um sawng pei ani hi” an mi ti pêk a. Motor lampui kan suok hma khan, vadung khawm Lawnglêngin kan kâi nghe nghe kha ti. A vadung chungah chun hruol lien deu hi det takin an khit a. A Khevapu chun hruol a khan a kei tâwl pei a, Lawnglêng zâp dêr lovin varâl a mi kâipui ani kha! Remchang an hriet ve ang reng kher el.

A hnunga chun ka zuk ngaituo zawm pei a, Missionary hai lungsietum zie a mi’n hriet suok tir a. Kan fe ṭana inthawk le kan um sung poa harsatna tam zie a taka va tâwng ni hai sien chu, missionary calling nei ṭhenkhat khawma ‘Lalpa, mi ko ta naw rawh’ tina khawp hiel niin ka hriet. Imu ka khawp naw le ka pang sil taluot leiin, kârkhat hiel chu dam ṭha thei lovin ka um pha a nih.

Pastor John Matthai in rawngbâwlna report ka pêk ṭumin, “vate ei mana ei insuo ang elin in mi’n suoh a, ei missionary pa hi iem a chang ti khawm mi ngaituo zui ta rêng rêng lo cheu” ka tih a, a ti thu dam ka hriet suok rum rum a. Missionary Kohranin ei tirsuok hrim hrim hin, enkâi zui hi an lo ṭul ding khawp el a nih. A ni nia chu, Missionary ei tir hin an umna ding le rawngbawlna an fepui dan ding lampui riruong fel taka siem hmasa phawt ding hlak chu ni ding a lo nih a! A thei lem chun school am ani dam siem thei inla, In a mi va pana tienlai ei inmawl hun lai ang ela Kristien ah hung inpe ta ro va ti ringawt nek chun thil a thaw theiiin, rawngbawlna khawm a fe hrât lem ring a um ngei.

Ramthim, ramhnuoi-ah mi ei tirlût a, umna ding nei mumal lovin belbul ding dam an zawng a. Pathien kona ṭha tak lo dawng ni naw hai sien chu, Missionary hai hin chierna ding an lo hau thei awm ngei el! Harsatna tamtak an tuor zing laiin, lawmman an hmu theilo chang dam a la hang um nawk hlakin. Missionary châwmtu hai khawm ringna tieng insuk hrâta, a hun taka missionary hlâw ding pêk thei dinga ṭhang lâk a pawimaw ding khawp el. An fâk le dâwn ding ngaituo leiin sum hnâr dang dam zawng hai sien, chierkhum na ding an tam hmel bawk si! Missionary sin hi kohran haiin ei thaw ding tak a nih a. Chuleiin, thlarau bohmang hai an manna dinga inrim taka rawng an bâwl zing laia, In hmun lai anga hang inmai khawm a; an rawngbâwlna a mihriem hai hang pur ding um bawk lo le, thlarau chau nilova taksa rama khawm sawmdâwl lemtu ding Missionary hai hin, a hun takah lâwmman hmu pei lem thei hai sien a ṭha ka ring ngei el!

Ramditum Ralsun, Duiganga, 27th July, 2016

Read: 586

Leave a Reply