A LA PANGNGAI ZING DING AM?

      No Comments on A LA PANGNGAI ZING DING AM?

Ziektu- H.Zate
Hmar Run.

Khawvel a cheng mi tin reng hin tuor inang, a la tuor naw khawma an tuor ngei ngei ding a um a, natna dang chu a tuortu ta dingin a na taka, Sienkhawm, hi thil; thina ruok hi chu a tuortu tak nekin a sunghai ta dingin a na lem!

Thina hin khawvel a hne a, iengkim siemtu Pathien chau naw chu ngam naw a nei naw a nih. Thina hi chu a nain a tawp chieng em a, a nawk hmu ding a um ta naw leiin thina khawpa inhremna hi chu Mipui rorelna sawrkarah chun pumpel an tum hram hram hlak a nih.
A Zo, a Vai, A sap a khawsak mi a the nawh a, a thlier hran chuong nawh. A tar a zur, thalai chenin a nuom hunah chun tu dang ruol lovin a thuoi liem el hlak a nih.
Hi thina hi chu a tur a na em a, Sap pachal khawma a tuor nem dan an hriet bik naw ni ding a na. Pu Eric Clapton meu khawm a naupa kum li mi, Conor le thina an hei intuok meu chun, Tears in Heaven phuokin, ‘Vanramah intawng nawk inla, a la pangngai zing ding am?!’,a ti hiel a nih. A ni ngei, thi le nat um ta nawna ah chun, ‘a la pangngai zing ding am?’, a hmaa ang khan, ‘Pa’ tiin a la ko ding am?!Thlakhla taka an inpawm hlak ang khan an la inpawm thei ding am?! Vanramah hmu lang che, a la pangngai zing ding am?!
Nu tia ka ko hlak khan Vanramah inhmu in la, a la pangngai zing ding am?! ‘Ka nau’, tiin a mi dawn nawk ding am?! A mi hmangai ang khan mi la hmangai zing a ti? “Ka nau”, tia mi kovin ka laka a lungril kha a la pangngai zing ding am?
Khawvelah rinum, harsat le beidawngna karah khawm hmangai taka mi lo enkawltu ka nu le pa hmangaina hi Vanramah a la pangngai zing ding am?!
Thuziektu pakhat chun, “Kan kiengah i um ta nawh ti hre suok rawp dinga i hming hrietsuok rawp hi ka nuom ta nawh!”, tiin a hmangai liem ta chu a lo inthla a. A ni ngei a nih, a hming hrietsuok zat a, a um ve ta nawh ti hriet sa zie ding hi chu a na em a nih. Thina meu hi chu a lo tawp chieng em a, Pasaltha khawmin a hmangai a chan meu chun a Pasaltha ni na a theinghil hiel hlak!
Khawvel sum tam taka inchawk thei naw hringna hi a hlu em lei hi ni naw nim, Iengkim chunga thuneitu Pathien meu khawm a, Setan kuomah a hmangai Job a fie ding khan a hringna chu hla dinga a lo ti kha!
Lungleng le khawsawt em em a indawm kunin an ngai thinain a hne ta hai an sun a, tuin dem thei an ta?
‘Ka sakhming hrein mi la ko thei i ti’m?
La pangngai zing a ti’m,
An hril van in mawiah!
Hi hnuoi maksanin i umna tieng hung pan ve lang, mi la hrein mi la ko thei i ti’m?! Van hmun mawiah chun, Ka kut chelin mi la kuo ve i ti’m? Ka ngai ang che hin mi la ngai ve i ti’m? tia tap hla rem el khawm a awl.
Sienkhawm, hi khawvel lungngainaa insukbuoi lovin, ‘khiva hming an lam pha um ka tih!’ ti hlak hai chu Vanah a la pangngai ding zie ah chieng a, hming an lam phaa um ve dinga ei beisei ram pan ding ei ni lem!

31 January 2017 | Thingdawl

Read: 184

Leave a Reply