PHERZAWL DISTRICT SIEM THUA REV DR LALKHAWLIEN PULAMTE INTERVIEW-NA; INTERVIEW-TU DR LAL DENA

LD (lal Dena): Reverend, ei pahni hi Zawlkhawpui val ve ve ei nih a. Zawlkhawpui khu lo suoksan ta inla khawm, ei manga chu vawisun chen khawm hin ei la suoksan thei nawh. Suongtuona le ngaituonain a phan phak lo, December 8, 2016-a district thar 7-hai laia Zawlkhawpui hming chawia district ei hang hmu el hi chu, Hmar mi a hre phak chun ei lawm hle ringawt a nih. Kei lem chu January 16, 2017-a Pherzawl District lawmnaah khan ei educatonist suongvawr Pu Ruoivel Pangamte le ei daktawr tuoidawng Dr Jire Pudaite-hai leh kan zu thang ve kha tie. Pu Zosanglien hlaphuok Nk Maryjones le Ms Lalhluopui-ha’n fawn hlep hlepaKan lawm ie, kan lawm ie, Pherzawl district hi, Beisei ngaituo hrui angin a tlin phak naw: Phuruol lo malsawmna mi petu Lalpa, Halleluia Amen, ropui tak raw se tia an lam suou suou laiin, Dr Jire Pudaite, thothang tha bawk si, hmeltha bawk si, ngo huntawk bawk si, figure tha tawk bawk si, bengvar bawk si, Sap tawng thiem bawk si, Hmar tawng thiem bawk si (si 7 nei) leh kan inthung hmunkhat a; DMO thar le inlaiin a kutpar intluon thlak le inno chak chela, “Phu ruol lo malsawmna mi petu, Lalpa, Haleluia Amen, ropuitak raw se” ti’n chawnban kan zu vawr hlep hlep a nih kha!

Lk (Lalkhawlien): Kei kha lai hun khan ka lo um remchang nawh a, ka chan ropui ngawt el.

LD: Luo a. Demand Committee on Upgradation of Pherzawl ADC dam in lo indin ni awm takin ka hriet a. Hi demand Committee intan dan tawi felt akin mi hril thei I ti?

LK: Kan indin ngei. A tarik chie ka zuk hril thei naw chea chu hi Committee hi August, 2011 khan kan lo indin a. Lalhmangpui Chairman a nih a, kei Secretary ka nih. Member 12 an um a, chulai chun ei unau Paite, Vaiphei, Gangte le Kukihai khawm an thang vawng.

LD: Chuong a ni chun a hming phurtu Pherzawl khuo a ni ringawta chu unau suopuihai leh inthuruol. Inthuruol taka in lo thaw tlang a ni chu tie maw! Tukhawm hin a puitling theina dingin hi district huom sunga khawtina lukhaitu thlangkhawma development committee siem a tul ding a nih. Hi Demand Committee thilthaw langsar deuh hai mi hril thei I ti?

LK: Hril thei e. D.S.Punya, Chief Secretary a ni lai khan public hearing-a November le December, 2011 khan tum hni ka zun lang nghe nghe.

LD: Anleh memorandum le document dam peklut in nei am? In nei chun, a copy dam hmu thei ning a tim? LK: Hmu thei ni e. September 25, 2011 khan Chief Minister Shri O.Ibobi kutah memorandum kan pek a. December 27, 2011 khan Chief Minister helicopterin Pherzawl ADC hawngna a zu nei ding tumin Memorandum dang kan ziek nawk a. Hi a copy khawm tiem thei a nih. Amiruokchu, CM kha ieng lei amani a fe ta nawh a, memorandum copy khawm ka kawl zing a, tiem thei zing a nih.

LD: Lawm a um khawp el, hma in lo lak nasa a. Anleh, mi thenkhat hril danin “Hmar People’s Human Right Forum Pu Chawngthahlei Chairman-na hnuoia Dr Manmohan Singh, prime minister kuomah khawm Pherzawl district hnina memorandum an lo peklut ve ti dam ka lo hriet a. Iem I comment?

LK: Aw ka hriet. Kei khawma thei tawpin ka lo bawzui kha tie.

LD: Anti-tribal bills pathum ni kuma an pasi ang khan, hi district siemthar hai khawm hi Hill Areas Committee (HAC) hriet lova an thaw ni awm takin an lang a. Iem I ngaidan?

LK: HAC-ah hin Dr Chaltawnlien Amo, Chairman a nih a. HAC hi an rawn naw ti an hrietna chu Vice Chairman, Kabuipa khawma a hriet naw leiin an ban pha a ni kha. District thar siem hi cabinet decision a nih. Cabinet meetingah khan Dr Chaltawn a thang ve nawh niin ka hriet.

LD: Election campaign lai khan, Dr Chaltawn-in campaign hla takin a hmanga, “thlang tling ka ni naw chun, Pherzawl District khawm hi puitling naw nih” a tih an ti ri ka lo hriet a. Iem I ngaidan?

LK: A tawng invet a ni chu! Ibobi’n a rawihai campaign hla dinga a lo phuok pek a ni hrim a. District Siem, a puitling le a puitling naw ding hi MLA pakhat chunga innghat a ni nawh. Tu lem hin chu ei MLA neisun hi opposition-a um a ni a, ieng chen am rawl a nei thei ding lo thlir phawt ei tih.

LD: District thar siem paruk danga MLA-hai chun, “ka siem a nih, ka thaw a nih” an ti ka hriet der nawh. Ei MLA pa ruok chun ama hmalakna lei lieu lieu niin a khekpui a…

LK: A hmaa ei hril ta ang khan, district nawrna hi mimal thaw a ni nawh a. Unau suopuihai leh inthuruol taka thaw tlang a nih. Tuhin unau suopuihai hming signed khawm ka la kawl vawng. A dik taka hril chun MLA pa le inhrepawa thaw a nih. District thar siem lai tak lem khan ei MLA kha Muolhoi, Haflong-ah inkhawmpuia a fe ni’n ka hriet. Remote control a nei a, Manipur sawrkar a hang control thei amani ding, kei chun ka hriet pha naw tawp el.

LD: Chu tieng pang chu a ieng kieng khawm lo nisien. United Naga Council (UNC) le Manipur sawrkar le Central sawrkarhai inkarah district thar siem hi core issue a ni tah a. Naga People’s Forum (NPF) MLA ha’n BJP ministry an thlawp a. NPF MLA-hai chu UNC thuhnuoia um an nih a. UNC chu NSCN le inkawp an ni nawk a. Iem ei la chang pei ding maw?

LK: District thar-hai hi Congress ministry siem nisien khawm, Manipur sawrkarin a siem a ni tah a. Governor-in suoi kei meuhva gazette notification insuo a ni tah a. An roll back em dim a ni? An thaw vai chun unau suopui Kukiha’n economic blockade thaw ve nawk an ta. Lungmuong takin lo thlir phawt el ei tiu. Anni ku hi thlawp tlat ei ta. Khuongsai President ka nina khawm hin lo hmang lo tangkai tum ka tih.

LD: Lawm a um ie. Thil um dan le fe pei dan ding chen fie takin I mi hril a. Memoranda-hai kha a remchang huna mipui tiem thei dinga insuo thei ning a tim?

LK: Ni e, I nuom hun huna lo pe el rawh.

LD: Moksanim (Reverend), lawm a um ie. Anniyonghi kesip si aw.

LK: Professor LD, kei khawm ka lawm. Anniyonghi kasip si aw.

~ Hmasawnna Thar, March 24, 2017

Read: 81

One thought on “PHERZAWL DISTRICT SIEM THUA REV DR LALKHAWLIEN PULAMTE INTERVIEW-NA; INTERVIEW-TU DR LAL DENA

Leave a Reply