A SAWT NAW NGEI!

      No Comments on A SAWT NAW NGEI!

A Sawt naw ngei

Pic: Lucy Hrahsel


Ziektu- H.Zate , Hmar Rûn

“I hmel chu a va țha kek kâwk de!” tia ka bieng a mi sikpek zau ni tluka inhawi le hlimum ka la hriet nawh.
Kha ni a inthawk khan kan inpawl a, innuiin kan hlim ve em em hlak. Amaa ringna ka innghat tluk zetin ama khawmin a mi ring ve a, kan inring tâwk a, kan hlim ve hle hlak.

Zân khat chu nambar hriet naw a inthawk WhatsApp ah thuthawn ka dawng a, a mi hung hal ve ringawt a; anachu, ka hriet hlak a ni naw leiin ka dawn vat nuom naw a. A hnung chun a mi hung biek nawk leiin ka dawn ta a. A ruolpain no. indik naw a lo hril leia mi hung hal rak a ni thu ka hriet ta a. Ngaidam a mi hni a, kei hlak ka lo suol ve bawk,Internet Pack Cheng 30 man bek a mi thunpek hma chu ngaidam naw ding angin ka inhril tlat a. A tlâwm em el ti malamin thla khat dam zet a mi hung thunpek a, ka lawmin Ka ngaidam chieng kher el. Chuong ang vel chu kan inhriet țan dan a nih.
Ni tin inbiein kan inpawl a, a mi ngaisak thiemin ama le inpawl chu inhawi ka ti em em hlak. Ka ngaizawng leh kan ințhe nun ngûoi lai a ni leiin ka ngûi em em a. Chuong lai taka ka hlimna mi’n tlunpek , a msg ringawt khawm ka hlimpui hi mak ka tiin ama ka ngainatna a sukzuol naw thei nawh. A msg ka tiem chun a rûkin ka lo innui ver ver hlak a, ka ruolhai khawmin mak an mi ti em em hlak. Ama leh hin chu khawvel hi a hlimum ngawi ngawi el a nih.
Inringni a ni a, Kan inchûkna in kan châwl hlau leiin Haflong khawpui fangin kan lêng a. Haflong Lake, Park, Gallery, New Haflong Station, Jatinga chenin a bike chun mi phurin kan lêng a, kha ni kha ka nuna ka hlim ni tak ani awm ie. A sanchu, Haflong Lake a leilakah ințhungin ka kut a chel , rem le rem naw inkara mi kuoin a mi hmangaina a mi inhlan a ni kha. A hma khawmin a lo hril rawp ta leiin kha ni khan chu ka lungril ka thup thei ta nawh. Ka biengah dawm a, ka sam chûl heu heu malama, “Ka hmangai che!” tia ka Hmûra a fawpna chu, “Kei khawmin!” ti zauhin ka dawnlêt/dawn kir ve ta a.
Ka dawnna a hriet le inruola a hmel a hlimna le lawmna, a mita hlim ti hriet taka khu sieu el ka hei hmu khan, kei, nuhmei a khawm ieng ni naw țawngbau leia mi pakhat nun hlimna ka lo intlun ve zie ka hmu a, ama nekin ka lawm lem hiel awm ie. Kha ni khan chu Khawvel hi a mawi bikin ka hriet a, Muolhoi khawpui khawm a ropui bikin ka hriet!
Sawt fang chuonga kan um hnung chun in tieng kan inlawi a, mani ina inlawi ding ie ti lo chun ka huphur rieu a, a kawla um zing dinga a kuom tieng pan kar mawl kha ka nghakhla!
Zanah WhatsApp a bawk inbie in, kan inpâwl nawk a. A nih, ama leh hin chu ka hlim a nih. Chat, Video Call, Voice Call, iengkim el kha inhawi ka ti ngawi ngawi el a nih. ‘A’nhawi let tawp tawp!’ hi a ni deu tawp.
Ni tin kan pahniin class kan fe a, a bike in a mi phur a, a kawlah ka um zing khawm hin ka ngai ngawi ngawi a, ka kuo nawk ngawi ngawi el hlak. A felin a mi ngaisak thiem em em a, ka hlim em em hlak.
Kan innel deu hnung le ka sunghaiin an mi hriet hnung chun kan inah a ruolpa leh an hung lêng ve a. A vawikhatna a ni leiin kan inzak a, inbiek khawm kan inbiek țha ngam nawh. A rûkin phone a inthawk kan intext zau zau ringawt a.
15 April 2017 | Thingdawl
Kan inngaizawng a inthawk chun kar 2 a ni ve ta a. Pathienni zantieng niin inhmu kan tum a. Ka lo nghâk a, ami hung Call a, “Ka hung tlung vang tah!” a ti a. Nghakhla takin ka lo nghak ran a.
Ka ring nekin a sawt ta a, ka call a, a lak thei nawh. Minute 10 hnung chun ka call nawk a, call chu a lak a, “hello, i va sawt ta de!” ka ti chun, pasal rawl hin, “tu am i ni? A unaunu i ni am?!” a mi hung ti a.
“ih, a ngaizawngnu ka nih?!” ka hei ti chun, “lamah a changsuol a, a na khawp el,” ti chu a mi hung dawnna a nih.
Inhmaw baklengin a changsuolna tieng pan chun kan tlan a, ka tlung chun mi an lo tam ta khawp el a. Ka’n sum thei nawh. Țap pumin ama ka pan a, ka kuo lawm lawm a, a bieng le a lua thisen kai hnuong chu ka tuoi fai a. Ka ko a, a hming ka lam a, mi dawntu a um nawh. A mi chu a la meng riei riei a, damdawiin panin kan tlan a, damdawiin pana kan tlan lai chun ka hmangai chun Khawvel rinum maksanin țap le rinum um ta nawna ramah a mi lo inlawisan ta a.

“A sawt naw ngei ei hlimlai ni!” ti chau chu ka chantâwk a ni ta si.

16 April 2017 | Thingdawl

Read: 61

Leave a Reply