Pherzawl District Bêlchiengna

Pherzawl District Belchiengna

-Pu Darsuothang Khawbung

(4th Thiemfin: Art and Literary Meet 2017, 25th March Convention Centre JNU, New Delhi a present anih)

Thu hawngna:

December ni 8, 2016 nia Manipur State sawrkarin district thar pasari (7) a siem thu puongdar a hung ni meu chu, mi tamtak a barakhaia. Lawmna ri le ringhlâna ri inkat nukin Manipur a sung tin, khuo tin le hmun tin haia hohlimna bung le changin a tling hiel. District thar ditnaw pawl unau Naga haiin ei hnukhrui rêkna’n Economic Blokade an nei zui nghal a, March 19, 2017 khan suktawp ani ṭawk. Ei kawl le kienga unaua ei ngai ṭhenkhat khawm district thar siem dan-ah lungawi lovin an lo khêk ve chûl bawk. Hmar ṭawng hmang hai lai khawm district thar hi nasa takin ei sopuia, ei la hril bâng nawh. Mihai neka sawrkar policy hril tlawm le pawnaw hlak hai khah district tharhai a hung pieng meu chuh a nawr dawktu inchua insîkna ri le a lawmna ri inpawl nukin ei la khûkpui zing hi ei khawthlir a danglam thut lei ni lovin, Manipur a ei ram del le ei inbukna hmun takah Pherzawl district a pieng tlat annawm! Sawrkar kut rawl tlawmna le hmun kilkhawra kum tamtak khawsa ta eini leiin hienga district thar siempek ei hung ni thut hih, Pherzawl district sunga khawsa hai chau ni lovin hmun hrang hranga inthawka hi lai ram ngaiven hlaktu hai tading chun mellung pawimaw tak el a tling hrim anih. Pherzawl district hi district taktak a nina dingin lam a hraw ding seitak ala um a. Israel haiin Jerusalem an ngainat anga ei ram ngainatu hai chun Sura lotlir le Nahai lotlir thaw insawk sawka thaw peiin  Pherzawl district hmasawnna dingin ei theina sengah hma ei lak a ṭul takzet.

Manipur a tlangram district ṭobul dan:

Kum 1891 khan Kumpinu rorelna-in Manipur Rêng lalrama ngai ni hlak khah Mingo Sap hai hrohrangin dam te’n a hung zap phak ve ta a. Chuong chun Manipur Durbar (Rorelna khawl) chu 1919 khan Mingo Sap hai le Rengpa inremna dung zuiin Phairam le Tlangram enkawltu bik ding kha lai huna inthawk khan a hrana siem alo ni ṭan ta kha a nih.

Manipur tlangram hai kha lai huna khan chu Sub-Division pathuma (3) ṭhe ani phawta, chu hai chu   (1) Suongpi (Churachandpur khuo hming hmasatak, Old Churachand tia ei lo hriet lar), (2) Tamenglong le (3) Ukhrul. Pu B. C. Gasper, 1921 hun laia Suongpi Sub-Division SDO, (Bawrsap) chun khuotuol mi tamtak Kumpinu sipai ṭhangpuitu dinga Pawtphurtu Sipai  (France Labour Corps) hai lawmlutna Ruoi a siema. Ei pi le pu hai mi hril sawng dan khan Indopui Pakhatna laia Ferent Ralkap fe hai kha annih. Labour Corps a hung kir hai lawmlutna ruoi siem pek anni le inzawm khan Manipur Rengpa, Pu Churachand Singh chu khuollien chawngpu dinga fiel ani angin Suongpi a hung sira. Chu le inzawma ama, Rengpa inzana inentirna le hrietzing na dinga Suongpi khaw hming khawm Churachandpur tia inbuk ṭan a nih. Suongpi Sub-Division khawm Churachandpur Sub-Division tia inbuk a hung ni tung pei tah a nih. Amiruokchuh, kum 1930 kumin Manipur Rengpain thusuok siemin tlangram Sub-Division pathum hai chu a ṭhieka, President-Manipur State Durbar kuta a sie el ta a. Tlangram hai chu North le South Manipur tiin remruotna thar induong khum nawk a hung ni a. Hieng ani tah lei hin Churachandpur Sub-Division Headquarter building complex (Suongpi hmuna Sawrkar In) hai zamsan a hung tula, maksana umhai po po chu Pu H. H. Coleman le Dr. Crozier, NEIGM Hotu hai kuomah Rengpain, a naunu Dr. Crozier hin asuk dam pek leiin, lawmman angin an hlan el a nih. Churachand hmuna Sawrkar Building hai chu Mission Office-in an inlet vawng ta a, Manipur Simthlanga Tangmi hai lem chun hi Quarter hmun  hi ‘Mission Compound’ tia ei hung hriet dan ani tah.

Kum 1933-34 in kar sung Manipur tlangram chu Sub-Division pathuma (3) the nawk ania: (1) SADAR (Selected Area Development Administrative Region (Churachandpur le Thanlon), (2) Tamenglong le (3) Ukhrul. Hienglai huna hin Thanlon chu Tamenglong Sub-Division hnuoia Circle office pakhata 1946 chen inawptir ani nawk thung.  Tinsuong khuo hnuoi tieng po, a khaw hnunga Hmarbiel tia eiin buk ta hi, Tinsuong Circle Office in alo enkai thung tina anih. Reng thupek anga  Sub-Division pathum siemthar hai laia pakhat Churachandpur Sub-Div., hmun (Suongpi)  khah Sub-Division Hqtrs. dinga hluo nawk thei ani taaknaw lei khan phaizawl hmun besanin Thuneitu haiin rem an ruot ta lema. Sub-Division Headquarter thar chu tuta Churachandpur Civil Hospital hmuna khin inthrut ania, New Churachandpur tiin. Mission Compound, maksan a umta chu Old Cuhrachand tia hming inbuk ani ta lem bawk. Sub-Division Office innghatna thar khawm Headquarter a hung ni taak leiin Headquarter Veng tia hriet larin a hung um a, tuchen hin hi hming hi a hung put sawng ta pei abnih.

Indopui Pahnina a hung tawp zova, kum sawt rak lo hnunga India ramin Independent a hung hmu zui pei khan Manipur khawm rorelna khawl a hung danglam peia. Manipur pumpui chu Indian Territory of Manipur ti hnuoia Valley le Hills unit pahnia rorelna dinga threin a hung um nawk taa. Pu PB Singh, Manipur Rengpa sangpa chu Chief Minister dinga ruot anih. Sawrkar lailawk hranghrang rovinrelna khawl, tlangmi hai huomsain hieng Interim Council / Hill Council / Electoral College tia indawtin kum 1949 aanthawka 1953 sung chenin inenkawl alo ania. Hi zo sawtnaw tea Manipur chu Union Territory pakhata hlangkai ve in a hung uma. Kum 1954 kum lem khan chu Scheduled Tribe recognition tlangmi haiin an hung hmu tawl taa, Imphal le Delhi hmuna Sawrkarna chelfung vawngtu hai khawmin Manipur tlangmi hai hmasawnna kawng lampui an hung ngaiven zuol pha hiela hriet anih. Kum 1963 kumin Manipur insawrkarna khawl khawm Legislative Assembly dan anga inenkawlna hnuoia sielut a hung ni nawk ta peia. Ram sung rorelna a siip anthoka a hnuoihnung tak chena in ṭheṭhawpna faifel lem beiseina in 1969 kumin Manipur pumpui chu Sub-Division chauha in relbawl nita lovin District paruk(6) zetah siemin a hung um taa. Hi ruol hin  Churachandpur sub-division khawm Manipur South District a hlangkai a ni ve taa, chuchu tuta Pherzawl District thar ang chiea thuneina siem pek le Revenue District puitling dinga hlangkai tina ania, kha hun lai khan alo ni hmasa tina anih. Circle Offices hai chu Sub-Division a hlangkai an hung ni nghal bawk anih.

Hieng hun (1946-1974) laia eini rawi chengna hmunbik hai politics inlumlet in alo chiezawp dan le inzawma thiltlung hai khah hrilhmai lo le inchiktlat chi alo ni zie tuta ei hun tawng mek hin ami hung hrilfie pek anih. Mizo Union thlipui Lushai Hills anthawka, (tuta Mizoram), hung hrang khan Manipur Simthlang khawm nasatakin alo nuoivir hun lai kha ania. Lushai Hills tieng District pakhat hnuoia umkhawm khah tak ram thlung ngei dinga beiseina lientak khan Hmar trawng hmang hai popo kha a lovin hmin hne tawl zie khah Keilet hla an phuok hai khan a hril fie hle el. Amiruokchuh, mipui ringnaw na tieng in Union Movement khan an phetsan taak leia hmatlir thar siemnaa Hmar trawng hmang haiin annei pha tah ti inla inkhel naw nih. Political movement thar Hmar trawng hmang hai delna rama hai a hung piengpha na khawm ani hiel pha anih. Political party hieng Hmar National Congress le Hmar National Union party dam a hung piengpha bawka, amiruokchu State levela politics khelna hmangruo dinga indinsuok nisi India Dan hnuoia Political Registration ruokchu thruoitu hmasa hai khan thaw anlo tumna khah hmu ding aum ve naw thung. Tuta Pherzawl revenue district ang chie ninaw sienkhawm, mani delna rama District inhumhim na ding khah nasa takin anlo buoipui ani pha hiel khah. Hmar Autonomous District ngenna hai chen thruoitu hmasa hai lungrila khan a piengpha taa, chu dungzui peiin District ngenna lekha hmasatak chu Chairman, North Eastern State Re-Organisation Committee le Prime Minister hai kuomah memoranduma induongin Pu hai J. Lungawi (1954); SK Hrangchal le Ruolneikhum Pakhuongte (1960); Ngurdinglien Sanate le Thangkhupvung Buongpui (1968) haiin sawrkar kuoma anlo peklut anih. Kha hun laia India Home Minister Pu YB Chavan Imphala a hung inzin truma HNU secretary le president, Pu Thangkhupvung Buongpui le Ngurdinglien Sanate haiin anlo in hmu pui truma an hmalakna lem kha chu thrangthar haiin la hung hriechieng zuol pei ei tih. District ngen a nina, trawngbaua in hriettir nawnna anva hrila Pu Chavanin India rama Hnam zawnga territory/District thar siemna central sawrkar policy ani tanaw thu hrilfiena a hei pek tawl le in ruola Pu Ngurdinglienin a lungawinawna inentir malama minister table intiim lova a zuk chum el le nasa taka anin khekkhum el thu dam khah inchik thlak la hung ni pei a tih. Remchang an hriet dan ang peia hmalatu hmasa ni kha Thranghmasa-Upa hai khan an pawi ti nawh. Tipaimukh Sub-Division pieng hma 1963 kuma Thanlon Bawrsap Pu Yangmasho Shaiza huoihawt, Republic Day le inzawmin Cultural Programme, Kailam hnuoi huopa Thanlon ah Camping aum trum khan Camp  Commander chu Pu S. Damkung ruot ania. Kha trum khan public leader le social worker anina kha hmang trangkaiin Tinsuong Cirlce – tuta Tipaimukh Sub-Div., nita hih, Thanlon Sub-Division anthawka khawidar le Sub-Division hranga hlangkai dingin Chief Secretary – Manipur kuoma Thanlon Bawrsap fethlenglin a ruol fepui Pu hai Chawngṭhahlei le Rothang hai leh Memorundum  an thêlut pui ve nih.

Rorelna khawl khawm a hung danglam peia, 1969 in Tipaimukh Sub-Division a pieng a, Vangai tlang tienga tlangram khuo sawmpali (14), Jiri Sub-Division sunga hai khawm Tipaimukh Sub-Division sungah State Government order no. 18-11-1971 – SC, dated:14-02-1972 hmangin rînlut an hung ni taa. Hi taka inthawk hin ‘Hmarbiel’ Tipaimukh Sub-Division eiti takpa hih a hung pieng ta a nih. Mi ṭhahnemngai hung suok nawk peiin 1997 bawr vel lai khan Pu hai Saia Hmar le Lalhriet Pakhuongte haiin ‘Hmar Autonomous District Demand Committee’ siemin Prime Minister kuomah memorandum an lo thelut ve nawka. Kum sangbi thar ei hung chuongkai zet chun Churachandpur District khawm inawp dan siem thar a hung ni pei taa. Kum 2005-2006 kum lem chu Pherzawl-ah ADC le Vangai tlang-ah T.D. Block thar hawng a hung ni nawk a. Hi hun laia Pherzawl ADC le Vangai TD Block inumtir dan dinga thrang nasa taka latu chu Pu Chaltonlien Amo ania. Manipur State level laia Hnam politics le ama Minister chanpui hai kara hi sin a nerthleng zovin “approval” lak na dingin Delhi tienga Delimitation Commission anthawk No Objection lak a trula, asanchu Delimitation Commission hrietpuina lova state sunga revenue boundary reng reng tawkchang a thieng naw lei anih. Hi le inzawm hin Pu Chaltonlien Amo in ngawr takin hma a lak. Tum khat lem chu ama trawngbau ngeiin, “Commission le Imphal Secretariat inkara correspondent lekha ngaivena ka hang in dawn kuol khawm File an milo thup pek tum leiin Meitei Babu hai zamaw sam pumin ka hrang khum pha hiel anih” a tih. Vangai TD Block khawm Sub-Division chena hlangkai hielin kum 2011 hnungtieng a hung um taa, kum sanghni zabi ei chuong kai meu chun ni danga Tinsuong Circle-SDC rank in a awp ve chauh na hmun hai chu Sub-Division pahni le ADC chenin eiin huot kai phak ta anih.

Hi hnung kum 2009 kumin Pu-hai Chawngthahlei, Darlienthang le Thangsang Intoate haiin Prime Minister kuomah ‘Autonomous District Council’ ngenna Tipaimukh biel besan bawk hin an lo pek vea. Hi trum lem hin chu respond thatak el an hmua, Manipur Chief Secretary chen khawma Churachandpur DC inhriettir sawngin, State Sawrkar kuomah ‘comment’ hung pekir ngei dingin inhriettirna khawm a pek hiel pha anih.

Hmasawnna rabi ṭhalem a um theina dingin, state sawrkarin policy siem thar peiin April 2015 khan Churachandpur District hnuoia Sub-Division thar 4 (Samulamlan, Sangaikot, Saikot le Tuibuong) siemtharin, Manipur Chief Minister in a hmun ngeia hai hawngna a neia. Chu ruola Administrative Head ‘T.D. Block’ siema um ta po chu sawm-le-pakhat Churachandpur District hnuoiah a hung ni ta a nih.

Pherzawl district a pieng:

Manipur tlangram le phairam politik khawm nasa taka inlumlet velin kum 2015 zo tieng lem chu a hung um ta peia, Tipaimuhkh MLA nilai mek Pu Chaltaonlien Amo khawm boruok inlumlet hai chieng taka tlir zing pumin November ni 9, 2016 in ama inrawina hnuoia indin Pherzawl District Demand Committee (PDDC) in Deputy Commissioner, Churachandpur fethlengin November ni 10, 2016 in Pherzawl district ngenna in Manipur CM kuomah memorandum pek anih. Kha memorandum a khan PDDC Secretary L. Thanzam Pulamte le Chairman, H.K. Joute ha’n hming an ziek a. Hi lekha an pekzo chawl karkhat khawm an vawi thathmain district thar pasarih (7), Pherzawl district thangsain puong a hung nita anih.

Pherzawl District siema um chu December ni 8 2016, sawrkar inrelbawl that lemna ding ring puma puonglang a lo ni reng ta khah. State Sawrkar Gazette Notification ang takin Thanlon T.D. Block, Tipaimukh T.D. le Vangai Range T.D. Block hai hmetkawpa Pherzawl District thar hin Manipur State Revenue Department sungah hmun pawimaw tak insawrkarna kawngah a hluo nghal anih. Manipur Sawrkar Thupek No. 408, ni 9, December 2016[Gazette Notification No. 16/20/2016-(R) dated 8th December 2016] nia suok Pu K Radhakumar Singh, Commissioner (Revenue), Revenue Department (Govt., of Manipur) in suoi a keikhum na lekhaphek pawimaw tak el chuh district thar pasari (7), Pherzawl District ṭhangsain, siem ani thu tlang hrieta puonglang a hung nih. Hi lekha thupek hi State Governor Thusuok pawimaw dang pathumin an zuitir nghala, chu hai chu ‘Transfer le Posting’ thusuok No. 25/6/2010-IAS/DP, tarik 08.12.2016, district tharhai awptu ding hai ruotna le Thusuok  No. 25/10/2011-IAS/D, tarik 08.12.2016, Dan-Thupek tienga invawnghimna kenkawtu ding hai ruotna ti annih. Pherzawl District thar chu Pu hai A Tombikanta Singh, IAS le N Manimohan Singh, IPS hai pahni chu DC le SP dinga hi thupek hai hin ruot an nih. Thlakhat an chie hman hmain Manipur sawrkarin thupekthar, pawimaw tak el, No. 1/4/2011-FX (EXP)/DFPR, tarik 03.01.2017 ansuo nawka. Hi thupek dungzui lem hin chuh State Finance Department dan ‘Delegation of Financial Powers Rules, 1995’ besan in DC ruotthar haiin an district awpna hmun sengah sawrkar sum district pakhata independent taka in enkawl na dinga thuneina pek anni na thu a hrilfie anih.

District thar 7 hai hi Sub-Division le Tribal Development Block (TD Block) um tasa hai remchang taka remkhawma siem annia, chuongang tak chun TD Block 2 (Vangai Range le Tipaimukh) Tipaimukh Sub-Division huom sunga mi le Thanlon Sub-Division huom sunga TD Block pakhat (Thanlon TD Block) keikawpa Pherzawl district hi induong suok a hung ni anih.

Pherzawl district ram leilung, piengphung le a ram mi hai:

Churachandpur District (4570 sq. km) chanve satthlak ani lei hin Pherzawl District hi a lien zie ding inkhi danin 2285 sq. km ni dinga hisap anih. Census 2011 dungzuia mihriem tam le tlawm dan a hnuoia ang hin hriet anih:

District mipui tamzat = 38027; Sex Ratio (no.of females per males) = 949; Literary percentage = 79.65%; Schedule Tribe percentage = 99.9%; Schedule Caste percentage = 0.1%; in umzat (Household unit) = 6432; Population Density = 26.84.

Kum 30 sunga Tipaimukh le Thanlon Sub-Division haia mihriem pung hrat dan:-

1971 1981 1991 2001
1.      Tipaimukh 15214 21176 23995 25374
2.      Thanlon 12889 17939 19209 22947

Source: Office of the Registrar General, Census of India, 2001

 

Tribe-wisea pung dan 2011 census data dungzui (Manipur state pumpui):-

Tribe 1971 2001 Pung zat
PAITE 24753 44861 20108
HMAR 23312 42690 19378
ZOU 10060 19112 9052
MIZO 7483 10520 3037
THADOU 51955 115045 63090
VAIPHEI 12347 27791 10444
SIMTE 4177 7150 2973
GANGTE 6307 15100 8793

Source: http://manipuronline.tripod.com/feature/population.htm

Pherzawl District sik-le-sa hi Manipur State sunga ding chun bu-le-bal le tlai chingna hmun ṭha ani tawla, commercial farming – hieng Serthlum, Aithing, Hmarcha, etc.- chingna hmun tha tak, Vangai tlang le Leizangphai phairuom hai hi ani tawl. Fur ruotui thlakrawnnatak khawm Tinsuong (Manipur South pumpui) tlangphei nia record anih.Sericluture le Horticulture tieng khawm Thanlon,Tinsuong le Senvon zotlang haia State Sawrkarin nikdang hma alo lak nasa hlaka. Amiruokchu Hnam indo dam le dan-thupek hai kengkaw theiruol lova village level an thawka district chen inawpdan a siet zawngin a hung um taak leiin Ram le Thing hmanga intodelna kawnga hmasawnna kalpen Sawrkarin anei hai chen khawm mumal taak lova a hung um pha ta a nih.

Continue reading on next page

Read: 134

Leave a Reply