Pherzawl District Bêlchiengna

District administration inenkawl dan:

Manipur annaw leh India ram insawrkarna enin district ti hi danbu (Constitution) haiah fiefai zeta hrilfiena a um nawh. Amiruokchuh, ei ram insawrkar le invawng danah ‘District’ hih a kalbi remtu pawimaw tak laia pakhat anih. Ei ram sunga sawrkar thlungpui dan le thupek kawng iengkima President Office (Rastrapati Bhawan) le Parliament an thawka Khawpui le Khawte kilkhawr chen hai a suk le tunga Sawrkar dan-thupek fe chur chur naa pawimaw tak el, a khaidiet keikhawmtu hiel chu District hi anih. Ei ram Sawrkar inawpdan a tawifel zawng taka, asip anthawka a sukzawnga zuk tlir chun hiengang hin: Republic of India (Rashtrapati Bhawan/Parliament) > State/Union Territory > Division > District > Sub Division /Blocks/Revenue Divisional Office/Sub-Collector/Sub Divisional Magistrate Office > Talukas/Mandals > Village [Gram/Gram Sabha/Village Authority/Village Administration Officer (VAO)] tia intringmat thriep anih. Khawpui (Metro Cities) sunga ruok chu invawng le inawpdan Khaidiet hi District > Municipal Corporations > Municipalities/City Councils > Ward tia ṭhre sawng anni thung.

State le Union Territory (UT) tin haiin akul ataia District vawng hringtu ding tamtak officer a siea, District lukhaitu hmingin Dy. Commisioner/District Collector/District Magistrate/Collector le anni tlawptu dingin ADC/ADM tamtak department izirin an um. Chun dan le thupek (law and order), tieng vawngtu ding bik dingin Superintendent of Police/Addl. S.P./DSP le a sawng in dawta officer le mipui rawngbawltu ding constable/cook/barber/chawkidar chen an um. A ram leilung hausak le pasiet thuin District sungah Development Officer/Staff le Revenue Officer/Staff hai State Sawrkar in a suk pungin a suk kiem thei bawk. Tamil Nadu le Manipur District haia Officer le Staff hai designation le mawphurna hieng lei hin an ang naw hle anih.

Hriet dan in district le a sunga roinrelna sin hi British inawp hun laia kha ṭan ani a. Warren Hasting khan District Collector (Dy.Commissioner) ti hming khawm a phuok nia hril ani nghe nghe. British haiin India Rama rorelna an kenkaw hun lai khan ram hmasawnna ding nekin Kumpinu hausakna ding khah Governor General le British Officer hai khan an target tak kha ani leiin District sunga ‘Sie’ (Tax) lakkhawm kha an ngai pawimaw hrim a nih. Chu lei taka district Bawrsap hai hih District Collector (DC)/Collector tia inko le inbuk an hung ni tung pei anih. South India State hai khun district Bawrsap hai hi Collector annaw leh District Collector tia anin ko dan annih. Eini tawng chun District Siekhawntu tia lam ding ning atih.

Kum 2015 tiema china Manipurin  Civil le Police – IAS/IPS an thawka MCS Officers akul ataia asawr zing hai chu hiengang hin : IAS=67, IPS=47, IFS=32,MPS=58, MCS=105 le MCS Probationers=77.  Sawrkar thawktu hai hi tlatin deu thawa Department hrang hranga um hai hih pension tawk an um zing hlak. Chu leiin tuta list hi vawisuna ding chun andik tak a tling phak tanaw ding tina anih.

Manipur State sawrkar hnuoia mipui enkawlna dinga Department tuchena in duonga um ei i hriet thei chin chu 45 an nih. Hi Department popo hi district thara hin zakhata sawmkuo pakuo vel a hmang ngei ring aum, hieng Deptts., hai phursuoktu dinga hmangruo pawimaw hai chu MLA/MDC/Village Authority hai khel ah Officer le Staff hai an nih. Mipui thlangtling hai chu term neia sinthaw annia, Officer le Staff hai hih a kul a taia District enkawltu le chawngpu hai chu anni lem. Chu ding chun vawisuna lekha inchuk le ṭhangna zawng mek hai hin Pherzawl District sawr tangkai tum ei tiu. A district sunga local ṭawng hmangtu haiin sawrkar sin tieng, lekha thiemna hmanga sin hmuna tieng ṭhang ei lak nasa naw chun kawr-le-vai anga ei I ngai hai tho Babu dingin hung tawl an tih.Chuongchu lo nisien Hmasawnna taktak ei hmu zo naw pha el dim, annawleh, ei ram del ve suna hin mihai sirde in ei um lem el dim? ti hai chen ei ngaituo zui dinga tha ning atih.

Hi taka inthawka chieng bal ela ei hmu thei chu ei ram sawrkar roinrelna hi a leilak annaw leh a khaidiet pakhat an fuknaw (phet/keisawi) ani chun a kakhawk seitak umin, tuoltro mipui ta dinga khawsakna kawnga harsatna namen lovin an tlun thei hlak. Chu chuh Tipaimukh biela sawrkar hmangruo hai function thei lova a um hih entirna pakhata hmang thei ni mei atih. Hi harsatna phuhruk na dinga district thar – Pherzawl District – khawm hi Manipur State Revenue Department anthawk sawrkarin inawpdan felfaina lampui (administrative convenience) ti changchawia a hung induong suok hrim a nih.

Constituency

Pherzawl District hi 55-Tipaimukh le 56-Thanlon Assembly Constituency hai huom sunga um anih. Hi constituency pahnihai hi Outer Manipur Parliamentary Constituency in a huom bawk.

Constituency siemna sin hi Indian Constitution in Delimitation Commission indin theina thupek Article 329(a) in a siem khuma. Census data hmangin Parliament le Assembly Constituency hai hi siem anni hlak. A hmasatakna a dingin 1951 khan ‘President of India’ le Election Commission of India inrawn tlangin siem ania. Chu hnungah, 1952, 1962, 1972 le 2002 kum indawt in nei anih.

Pherzawl District sunga um, 55-Tipaimukh le 56-Thanlon Assembly Constituency hai hi 1972 Delimitation tuma siem annih. Chu hma a Manipur Assembly Election 1967 neinaa khan Tipaimukh Assembly seat a la pieng naw a, Hmarbiel khuo popo kha Jiribam le Thanlon Constituency haiin an insem anih. Asanchu, 1970 chena khan Manipurin Assembly seat 30 chau anei lei kha anih.

Union Territory a’nthawka State puitlinga Manipur hlangkaia aum le 1972 kuma Delimitation a hung um khan Manipur pumpui Seat 30 ni hlak khah Assembly Seat 60 a hlangkai ani nawka. Chun hi Seat umzat hih tiemchin um dinga Delimitation Commission in ‘Freezing’ a thaw anih.

Hieng ani leiin Pherzawl District hi Assembly Constituency pahni awp khumin kum iemani chen chu a la um ding tina anih.

Member of District Council Constituency roukchu Pherzawl district hnuoia hin pali a uma, chu hai chu State Election Commission (SEC) – Manipur State Department hnuoia Municipal le District Council election enkawltuin a khai annih. Manipur (Hill Areas) District Council Act, 1971 dan hnuoia Council Constituency hai popo hi inkeihruoi annia,electoral roll(Voter list) ruok chu Election Commission office branch Chief Electoral Officer-Manipurin a siem hai MDC elction huna hmang ani ve nawk tho. Member of District Council Constituency rinkuol le siemthrat khawm Manipura State Election Commission(SEC) hin thuneina pumhlum aneia,Central Sawrkar hrietpuina khawm lak trul lovin State levela a zofai el hlak bawk.

Thu khârna

District thar Gazette Notification ena chieng em em chu Commissioner – Revenue Department, Government of Manipur-in ansuo, Indian Constitution a Schedule hai besan aninaw thu le sirsan hran a nei nawh ti hih anih. District thar hin ei ram Constitution in ‘Provision thrataka a inei hai,’ Fifth le Sixth Schedule ei hril rawp hlak hai ngirsanna a siemsuok khawm a nina aum nawh. Manipur State sunga tlangram District, official tawng taka, ‘Hill District’ unique anina hai ruok chuh HSA-Delhi Jt. Hqtr.in alo huoihawt ‘DAWNTLANG’ tarik 28th January, 2017 tuma Pu L.Keivom paper present naa zieklang –The Manipur State Constitution Act 1947 hnuoia siem Manipur Hill Peoples (Administration) Regulation 1947, Manipur Union Territory Council Act 1956 hnuoia indin Hill Area Committee, North East State Re-Organisation Act 1971 hai bakah Manipur State Courts Act 1947, Manipur (Hill Areas) District Council Act 1971 le Manipur Hill Village Authority Act 1956 hai hi a sukdettu le Manipur ram sunga Tlangram  District humhimtu, tuchen ngirhmuna ding chun ala ni hri anih. Chun ei ram chenga pumpuia Revenue District, State Revenue Department hnuoia siem hai hi, a chin taluo le a lien zawnga lien taluo inkhina hmawl aum nawh. India ram sunga a chintak chu Mahe District – Puducherry Union Territory sunga mi khu ania, 9 sq. km chaua chin anih. A letling nawka ruok chu Kutch District – Gujarat State sunga um chuh district lai po pova lientak, 45652 sq. km. zeta lien ani nawk thung. Sawrkar Department hieng Election, Police (Home), Forest, Education le a dangdang haiin anni invawng felna dinga tha le rema an hriet dan hai angin anin siem ve thei bawk. Entirna dingin Assam State chun a ram sung pumpui chu Division hrang hrangin a the phawta, chu hnuoia chun Revenue District 28 zetin a the nawk sawng. Amiruokchuh, Assam-in election district 50 zet anei thung. Chu ang bawkin Police Department khawma anni sunga sinthaw awlsam le remchang anga in duongin Police khawma a hranin District boundary annei thei. Tuta ei chaitak Pherzawl District hi chu Revenue Department hnuoia India rama State po povin an inei ‘District’ ang anih. Dan narin state sawrkar department dang dang hai khawma Revenue District rinkuolsung  hi anni department invawng dan dingin anzuk hmang le an zui tlangpui ani hlak.

Pherzawl district thar anthawka hrietfie trul nawk zuol chu India danpuiin hnam hnufuol huong sunga a tiem Tribal (ST) hai delna rama inthut ania, amiruokchu Sixth Schedule-in an zam khum nisi lo, Manipur tuolto tribal hai inhum nading dan hrang hrang (a chungtienga tarlang) hmangin state sawrkarin inhumhimna ala siem pek ti anih. An leh India danpui hnuoia tribal haiin inhumhimna dinga induong, Sixth Schedule hi eini rawi tribal nisi, sawr ve lova ei um zing el hih, hi district thar anthawka hmabak tha lem le Sixth Schedule district hiel khawm chu a hung insieng nading lampui ani thei ding am? Kawngdanga tlirin hmalak rak ngai lova India Sawrkar le Unau Naga hai inbiekna annaw leh Manipur rama tlangmi “helpawl” KNO/UPF hai le Sawrkarin inremna an ziek hun phat a Sixth Schedule district chu hung piengsuok ngei dinga ringin eilo nghak chawt el hi a hadamna tak ani el naw ding maw? Sixth Schedule thuneina hin Assam Tribal (Meghalaya+Mizoram) hai bak an kawk tira?, ti dam ngaituo zawm chi tak anih.

Manipur ram insawrkar  le invawng dan, kum 1919 anthawka tlir puma Pherzawl District bi chiengna einei le inzawma hin ‘’Sawrkar Policy’’ vawi tamtak hem danglamin aum a. Inchuk ding tamtak hmu ding khawmin aum. District thar hai hih Gazette Notification le Governor Order haiin a tuom khum ani leiin nuompawnga a zuk hlip nawk el chu ring aum nawh. Manipur politics inlumlet dan enin kum sawt raklo hnungah Sixth Schedule hnuoiah sielut a hung ni lem ring aum. Thutha le hla tha ei ramdelna sunga khawvel inthanglien ang peia mipui ta dinga hamthatna a hung lut hin lawmnani in an tlun ngei hlak. Chuongni hai ah thangthar hai hin thanghlui hai, an hriet le an theichina hma lo la hmasatu le Hnam rawngbawlnaa tha le zung lo seng ve hlak hai, hrefuzie hlak tum ei tieu. Hi hih ei Sinlung Tlawmngaina indik tak khawm anih. Chuong annaw chun tuta ‘Generation’ hai hih nakie pha ei thahnemngaina thahrui hai Hnam History in mi theinghil tawl pal hlau a tih.

District ei ram delna tieng a pieng chun, a sukbubittu dinghai ruok chuh inchuklaihai annih. Mawphurna lientak neitu khawm inchuklai hai annih ti khawm hi thusui naa inthawk hin a chieng hle in anlang. Pherzawl  District  damsawt raw seh.

References

  1. Keivom, L (2016), “Pherzawl & Bethlehem,” New Delhi: Delhi Thurawn XXXII: 11.
  2. Keivom, L (2017), “Pherzawl District: An Overview,” New Delhi: Delhi Thurawn XXXII: 14.
  3. Dena, Lal (2017), “District Tharhai,” New Delhi: Delhi Thurawn XXXII: 14.
  4. http://manipuronline.tripod.com/feature/population.htm
  5. of Manipur, Directorate of Economics and Statistics (2014), Statistical Yearbook Churachandpur District
  6. of India, Office of the Registrar General & Census Commissioner (2011), Census Data http://censusindia.gov.in/
  7. http://desmanipur.gov.in/files/NewsFiles/04Jul2015023701C.C.%20Pur%20District%20Statistical%20Year%20Book-2014.pdf
  8. of Manipur Gazette Notification No. 16/20/2016-(R) dated 8th December 2016
  9. http://manipur.gov.in/?page_id=11644
  10. “The Dynamics of Mizo Movement” http://shodhganga.inflibnet.ac.in/bitstream/10603/16808/8/08_chapter%202.pdf
  11. Soilalsiam “Changing Vaiphei Society: A Geographical study, Chapter II” http://shodhganga.inflibnet.ac.in/bitstream/10603/5374/9/09_chapter%202.pdf
Read: 135

Leave a Reply