I CHAPO KINGKENG!

      1 Comment on I CHAPO KINGKENG!

I CHAPO KINGKENG!

“A suong taphawtin Lalpa chu suong raw se” 1 Kor 1:31

Ziektu: Rev. Dr. H.M.Songate Songate

Nu pakhat chu a nau upatakin BA a hung pass zo hlimin a lawm taluo a, a ruolhai kuomah, chapo kangin, “Ka naupa nuhmei ding awm hi chu ka la hmu zo nawh!” a tih a. A ruolhai na a khei hle leiin a thu hril chu an lar phien el! Hlak chu, hun sawtnawte hnungah a naupa’n ‘nuthlawi, ama neka upa lem’ a hung ṭhuoilut bur! A mo ding an lo tam zie a hriet dawk dai tah ka ring! Pa pakhat nawk thung chu, a naupa bible school ah vairam tieng a tir zo le zo lovin an in kuom le velhai lai, “In nauhai bible inchuka tirna chang hlak hre ve lo cheu” tiin ṭawng inhawitirna takin a hmanga, hlak chu; hun sawtnaw te ah, an chukna sunzawm thei lovin hnawt dawkin a hung kir nawk! Kha hma deua kohran rama ‘ama hi chu ro fe dan a hriet, ro mi tak a nih’, an tihai kha ka hang ngaituo chet cheta, mi ṭawngthei, insel hrat le inzak inphak dawn mang lova, ṭawng pur purhai kha an lo ni deuin ka hriet! Ei lo suonghai le ei lo insuong vena hai ka ngaituo chang chu inzak um ka ti hlak. Inhma lai khan tlangval pakhat hi ka Pi Lalṭha (Pu VL Ngena nuhmei) in, “Sun lumlai tak, Nectie le khawtieng fe tum am in le?” a lo ti a. Ama chun, inphalam der lovin, “MA val meu chu thawding bovin leng ei tim” tiin a dawn. PUC fail ana, MA ani naw sawng! Mi tamtak chun, an hrietna, an thiemna, an hlawtlingna dam an suonga, (a dan a la um deu) eini rawi ruok chun, ei chauna thup pumin, inphalamna um der lovin, khel belsa in, ei la chapopui nawk hlak! Nang teh, I chapo kingkeng ve?

Krista ei varna, felna, thienghlimna le sandamna: 1 Kor 26-30 sung kha chieng tawka ei bi le hriet a ṭul em em. “Unauhai, a kona cheu hi ngaituo ta u, taksa tienga mi var tamtakhai, mi hrat tamtakhai, mi ṭha tamtakhai ko an ni naw zie hi. … Pathienin khawvel thil invethai a thlang lem a, mivarhai a sukmuolpho theina dingin….hratnawhai a thlanga, mihrathai a sukmuolpho theina dingin….Chuongchun, Pathien hmaah mi tikhawm insuong thei naw ni hai….ama chu Pathien kuoma inthawka ei tadinga varnaa siem a nih, felna dam, thienghlimna dam, intlanna dam leh; Chuongchun, an ziek ang khan ‘A suong taphawt chun Lalpa chu suong raw se”. Pathienin ama ringtu ding le a hnungzuitu dinga mi a ko dan le ei ni rawi inzawng dan hi a letling tawp a nih. Khawvel mit in ei menga, khawvel inzawng danin ei inzawnga, khawvel ngaituona danin ei ngaituo rawp hlak leiin, suong lo ding ei lo suong rawp hlak a, ngaisang lo ding ei lo ngaisang rawp hlak a nih. Mi tamtak lem chu Bible in a hril angin “In uongnahai hi in suong lem si a” ati groupah ei ṭhang zing. Pathienin varna hrim hrim a ditnaw ni lovin, mihriem hratna le varnaa ei innghat pha leh, mihriem ei suongin ei chapopui hlaka, Ama mawina ding a dal hlak leiin, a remti naw hulhuol el a nih. Chung tienga inthawka varna (wisdom) kha Pathien lawmtlak varna a nih. Hnuoi tieng varna (clever, dawha ṭhang hrietna) kha suk muolpho a nuom a, mi hriem tha hratnaa innghatna kulpui kha thiek a nuom bawk a nih. Nang, ro hre mi maw I nih? I hrietna kha khawlai a inthawka hung am a na, I varna kha khawvel varna peithlak hnunga chungtieng varna ani de’m? Chuong ani naw chun, nuom pawng sel hrat mei mei ning I tih! Kha ku kha a nih, Pathienin a dehawn chu.

Khawvel miha’n ‘Kei’ an uor: Tulaia Football inkhelna hlaw in pe rawntak hai chu China Football clubhai khi an nih. Khawvela sports tienga hlaw tamtakhai khi an playerhai an nih. Carlos Tavez, Argentina football player thiempa khi nitin Rs. 83, 70,000/- in Shenshui football club in an ruoi. Tam ṭal ṭal tak a nih. Cristiano Ronaldo lem chu India sumin nitin crore khat neka tam hlaw dingin an fiel ve thung. Chuong zat zat hlaw hai sienkhawm an umdan le an nungchang an suk danglam chuong nawh. Ei ni rawi nu pakhat chanchin an hril ka hriet zing chu- a pasalin promotion a hmu a, officer khawm la nilo kha a lo uongpui taluoa, “kan pa ku hi aw, sahro chikte bek a ṭhang naw chun iengkhawm a lem thei ta nawh” a tih, an ti chu!

Chapo kanga ei ṭawnghai hi ei la uongpui takluo ana maw! Sum Rs. 1000/- chau khawm ei enkawl (manage) thei naw chun iengtinam Rs.10,000/- pekin um ei ta? Ei pasie tawl kuhi lawm a um letling vieu a nih! Nuhmei nauhai khawsak theina tawk khawm hlaw zo lovin, inti pawr emem in zu leh ei la hei inhawk nawk hlak a na. Ei taksain a mammaw lei ni lovin ei uongthuong leia ei thaw ani hlak. Chapo kangin khawlai dungah ei lan hrawt nawk hlak! Khawvela hlawtlingna nei insanghai hieng celebrety hai sportsperson le mi hausa tawpkhawkhai hin an uortak chu, “I believe in myself” (Kei le kei kan ringzo). “I know I can do it” (Ka thawthei ti ka chieng) tihai, “Believe in yourself” (Nang le nang inringzo rawh), ti dam, “I can do it” (Ka thawthei) tihai hi a nih. Mani inhril thau raka, siemtu le malsawmtu hming theinghil vang vang hi khawvel hmasawnna lientak nisien a hawi. Inkhelna tienga thuomhnaw (sportswear) siemtu lientak, Nike chun “Just do it” (thaw el rawh) ti hi logo in an hmang. Mani le mani insuongna ramah ei inthuoi lut zo an tah. Siemtu pawimawna le ami vengna tieng chu a muol muolin in ei ṭhel an tah. Mani le mani inringzo le confidence nei ding chu ei ni ngei luoa, amiruokchu, hriselna, taimakna, tumruna, rem hrietna le hlawtlingna mi petu Pathien kha ei bawkan nasa taluo hi an dik nawh. Paul chun, “Kristaa chun iengkim ka thaw thei” (I can do all thing through Christ) alo tih. Amin thawtir theitu hrefu lova mani chau inhril thau hi ‘Chapona suol’ ana, Pathien lawmzawng a tling naw a nih. Europe ram tieng chu, mi’n “kristien ka nih” an ti pha, an mi nui eu a. Gay (Mongkuohur ka nih), lesbian (nuhmei le nuhmei indit) kan nih an ti pha kut an ber dur dur hlak. Suol an suk ropuia, thil ṭha le mawihai an deusaw nasa ta emem. Obama an lar vena le a hming ṭhat vena pakhat chu America rama Gay Marriage (Pasal le pasal le nuhmei le nuhmei innei) a phalna kha ani ve tlat. Britishhai Prime Minister hlui David Camerron an ban khan, lawmthu hriltu an MP un deu deuhaiin, “Gay marriage” a phal kha an lawmpui tak thu parliament ah an hril! Chapo kangin, suol ei suklara, ei vawrlar el ta hi a pawi emem. I lo chapo ve kingkeng el am aw!

Inngaitlawmna le malsawmna an zawm: Pathienin Mosie chimbuka inthawka a hung ko khan, hieng ang hin a dawn a, “Aigupta rama inthawka Israel thlahai hung ṭhuoi suok ding le Pharoa kuoma fe ding chun ke hi tu’m ka na? a tih (Ex3:11). Beram vengtu el ani zie kha na hriet a, Aigupta rama a thiemna le varnahai kha Pathien hmaah iengmalo ani zie a hung puonglang a nih. Chun, Israelhai a ṭ huoi lai khan, iemani chenah a sawl emem hlak a, a beidawng bawk hlaka. Chu pha chun Pathien kuomah a tlulut hlak. “I mi umpui zingna chu ka kuomah a fe pei naw chun, hi taka inthawk hin mi ṭhuoi suok naw rawh”(Ex 33:15) (If your presence does not go with us, do not send us up from here). Lal Solomon chun, “Kei hi tu’m ka na ka pa David aia lala inṭ hung ding chu. Naupang el ka na ka lut le ka suok khawm ka hriet nawh”. A lo ti bawka. Ei ni rawi chu ei inti var a, ei suok le ei lut kuhi ei byheart sa vawng a nih! Hieng ang lawma, inngaihnuoia Pathien an biek hin, Pathien a suklawma, a hung biek let ve a, malsawmna le ditsakna in a hung vur hlak a nih. Ei ni rawi chu, thil chite, mi danghai dawng lo ang deu hmua ei inngai pha chu ei khuo le veng haiin an mi tuor ngai nawh. Chapo kangin ei ṭawnga, ei ring ei dawfan a, fit ruk hnuoi ei mel ngai nawh! Pathienin a biek pha che, ‘I chapo kang’ hlak am? Pathien le inbe zo hlim mi chapo pakhat khawm bible ah an um nawh! Kei khawm rongbawltu lien le chin, senior le junior, Sap, Vai le hnam dang dang dang leh a suk a tungin rong kan bawl hlak a, thlarau mi hai ‘chapo kingkeng’ pakhat khawm ka la hmu nawh. An hriet lovin an hratna thuruk kalo inchuk tum hlak! Taksa ram le thlarau rama malsawmna ei dawng thei naw nasan chu “Ei chapo awl kingkeng taluo” lei a nih. Paul in “Kei ruok chun ei Lalpa Isu Krista kros naw chu ka suong naw ding zie chu” a tih (Gal 6:14). Unau, I la ‘Chapo kingkeng’ am?

Hmasawnna Thar, July 9, 2017

Read: 37

One thought on “I CHAPO KINGKENG!

Leave a Reply